ރިޔާސީ އިންތިހާބުގައި ވާދަކުރެއްވުމަށް ވަރަށް އަވަހަށް ފޯމް ހުށަހަޅުއްވާނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވިދާޅުވެއްޖެއެވެ. ރައީސް މިހެން ވިދާޅުވީ، ހއ. އަތޮޅުގެ ރަށްތަކަށް ކުރެއްވި ދަތުރުފުޅު ނިންމަވާލެއްވުމަށްފަހު، މީޑިއާތަކަށް މައުލޫމާތު ދެއްވަމުންނެވެ. 

ރައީސް ވިދާޅުވީ އެމަނިކުފާނުގެ ރަނިންމޭޓްކަމަށް ހަމަޖައްސަވާނެ ބޭފުޅެއް ބުރާސްފަތި ދުވަހުގެ ރޭ އެންމެ ލަސްވެގެން ކަނޑައަޅުއްވާނެކަމަށެވެ. އަދި ރަނިންމޭޓް ކަނޑައެޅުމަށްފަހު އެންމެ ލަސްވެގެން ހުކުރު ދުވަހު އިންތިހާބުގައި ވާދަކުރުމަށް ފޯމް ހުށަހަޅާނެކަމަށެވެ.

ރިޔާސީ އިންތިހާބުގައި އެމްޑީޕީއާ އެކުގައި ކޯލިޝަން ހެދުމުގެ ފުރުސަތު އަދި ބަންދުނުވާ ކަމަށާއި ހުރިހާ ޕާޓީއަކަށްވެސް މަރުހަބާ ވިދާޅުވާނެ ކަމަށްވެސް ރައީސް ވަނީ ވިދާޅުވެފައެވެ. ރިޔާސީ އިންތިހާބުގައި ވާދަކުރުމަށް ހުޅުވާލާފައިވާ ފުރުސަތު ހަމަވާނީ އަންނަ ހޯމަދުވަހުއެވެ.