ޤައުމުގައި ސިޔާސީ ހަމަނުޖެހުންތައް އޮވެގެން ރައްޔިތުންނަށް ލިބޭނެ އިޤުތިޞާދީ މަންފާއެއް ނޯންނާނެ ކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

ރައީސް މިހެން ވިދާޅުވީ، ރިޔާސީ އިންތިޚާބުގެ ކެމްޕޭނުގެ ތެރެއިން، ހދ ހަނިމާދޫ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ. 

ރައީސުލްޖުމްހޫރިއްޔާ ވިދާޅުވީ، އެންމެ ފުރަތަމަ ކުރަންވީ ކަމަކީ، ހަލަބޮޅި ކަމާއި، ސިޔާސީ ދެކޮޅުވެރި ކަމުން ދުރަށް ދިޔުންކަމަށެވެ. އަދި މިވޭތުވެދިޔަ 5 އަހަރުގެ ތެރޭގައި މަސައްކަތް ކުރަައްވަމުން ގެންދެވީ ޤައުމުގައި ހަމަޖެހުން ޤާއިމްކުރެއްވުމަށް ކަމަށެވެ. އަދި ތަރައްޤީގެ މަޝްރޫޢުތައް ރާއްޖޭގައި ކުރިޔަށް އެދަނީ އެހެންވެގެން ކަމުގައި ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، އަނެއްކާވެސް ރިޔާސީ އިންތިޚާބެއް ކުރިމަތިވެގެން އަންނައިރު، ރައްޔިތުން މިއޮތީ ގޮތް ނިންމަންޖެހިފައި ކަމަށާއި، ސަރުކާރުތަކުގެ ތަފާތަށް ބަލަންޖެހޭނެ ކަމަށެވެ. އަދި ސިޔާސީ ހަލަބޮލިކަމުން ދުރުވެ ތިބުމުން ގިނަ މަސައްކަތްތަކެއް ކުރެވެނެ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ. މިގޮތުން ރައީސް ޔާމީނުގެ ދައުރުގައި ކަން ހިނގާފައިވާ ގޮތުގެ މައްޗަށް ރައީސް އަލިއަޅުއްވާލެއްވިއެވެ.

ރައީސުލްޖުމްހޫރިއްޔާ ވިދާޅުވީ، ޕީީޕީއެމްއިން ކޮންމެ މީހަކު ނުކުތަސް އެބޭފުޅުން ދަމަހައްޓާނީ ޕީޕީއެމްގެ ސިޔާސަތުކަމަށާއި، އެސިޔާސަތަކީ، ޚިޔާލުތަފާތުވާ މީހުން ޖަލުގައި ބޭތިއްބުން ކަމުގައި ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ތިލަދުންމައްޗަށް ކުރެއްވި ކެމްޕޭން ދަތުރުފުޅު މެދު ކަނޑުއްވާލެއްވުމަށްފަހުގައި އެމަނިކުފާނު ވަނީ، ރޭ މާލެ ވަޑައިގެންފައެވެ.