މާލެ ސިޓީގެ މަގުތަކަކީ ސާފުތާހިރު ހިތްފަސޭހަތަނަކަށް ހެދުމަށްޓަކައި ކުރެވޭ މަސައްކަތުގެ ތެރެއިން މާލޭ މަގުމަތީ ހުންނަތާ ގިނަދުވަސްވެ، ބާވެ ހަލާކުވެފައި ހުރި އުޅަނދުތައް ނަގަން ފަށައިފިއެވެ.

މާލޭ ސިޓީ ކައުންސިލުން ހާމަކުރައްވާ ގޮތުގައި އެމަސައްކަތް ހޮނިހިރު ދުވަހު ފަށާފައި ވަނީ، އެކައުންސިލާއި، ފުލުހުންގެ އިދާރާއިން ގުޅިގެންނެވެ. މާލެ ސިޓީ ކައުންސިލުން ފާހަގަކުރައްވާަފައިވާ ގޮތުގައި މާލޭގެ މަގުތައް މަތީގައި އަދި ޕާކިން ޒޯނުތަކުގައި ގިނަ އަދަދެއްގެ ބައު އުޅަނދުފަހަރު މަގުމައްޗަށް ދޫކޮށްލާފައި އެބަހުއްޓެވެ. އެހެންވެ އެތަކެތި ނަގައި މަގުތައް ސާފު ކުރުމަކީ، ދުއްވާ އެއްޗިއްސާއި ހިނގާމީހުންނަށްވެސް އެކަމުން ފަސޭހަތައް ލިބިގެންދާނެކަމެއްކަން ސިޓީކައުންސިލުން ފާހަގަކުރައްވާފައި ވެއެވެ.

މީގެ ކުރިން ފުލުހުންނާއި އެޗްޑީސީން ގުޅިގެން ވަނީ، ހުޅުމާލެ އިންޑަސްޓްރިއަލް ޒޯނުގައި ހުރި އެފަދަ ބައު އުޅަނދުތައް ނެގުމުގެ މަސައްކަތްތަކެއް މިދިޔަ މަހުގެ ތެރޭގައި ކޮށްފައެވެ. އެފަހަރުވެސް ހުޅުމާލޭގެ މަގުތައް މަތިން 300 އާއި ގާތްކުރާ އަދަދަކަށް އުޅަނދުތައް ނަގާފައިވެއެވެ.