ގެސްޓުހައުސް ވިޔަފާރިތަކަށް ފަސޭހައިން ލޯނު ލިބޭނެ މަގު ފަހިކުރުމަށް އެކަމަށް ހާއްސަކޮށްގެން ފަންޑެއް ހުޅުއްވައިދެއްވާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.

ބޮޑުތިލަދުންމައްޗަށް ކުރެއްވި ކެންޕެއިން ދަތުރުފުޅުގައި ހއ. ބާރަށަށް ވަޑައިގެން ރައީސް ވިދާޅުވީ، އަލަށް ވިޔަފާރި ފަށާ މީހުންނާއި، މިހާރު ހިންގަމުންދާ ވިޔަފާރިތަކަށް ހާއްސަކޮށް ގެސްޓުހައުސްތަކަށް ފަންޑެއް ހުޅުވާ އޭގެ ތެރެއިން ލުއި ލޯނު ލިބޭނެ އިންތިޒާމު ހަމަޖައްސައިދެއްވާނެ ކަމަށެވެ. 

ލޯކަލް ޓޫރިޒަމް ފައްކާކުރުމަށް ބާރަށަކީ ރަނގަޅު ރަށެއް ކަމަށް ރައީސް ވަނީ ވިދާޅުވެފައެވެ. އެގޮތުން, ކައިރީގައި އެއާޕޯޓެއް އޮތް ކަމަށާއި، އެއީވެސް ފަތުރުވެރިކަން ކުރިއެރުވުމަށް އޮތް ތަނަވަސް ދޮރެއްކަމަށް އެމަނިކުފާނު ވިދާޅުވި އެވެ. 

މީގެ އިތުރުން, ރައީސް މިއަދު ކުރެއްވި ޓުވީޓެއްގައި ވިދާޅުވީ, ލޯކަލް ޓުއަރިޒަމަށް އުފައްދާ ފަންޑުގެ ސަބަބުން, ބޮޑުތިލަދުންމަތިން ފެށިގެން އައްޑުއަށް ރަށު ފަތުރުވެރިކަން ފުޅާވެ ރާއްޖޭގެ ޖީޑީޕީ ދެގުނަވެގެން ދާނެ ކަމަށެވެ.

ރާއްޖޭގައި ލޯކަލް ޓޫރިޒަމް މިހާރު އަންނަނީ ފުޅާވަމުންނެވެ. މި ވިޔަފާރިތަކަށް އޮތް އެންމެ ބޮޑު އެއް ގޮންޖެހުމަކީ ފަސޭހައިން ލޯނު ލިބޭނެ މަގު ފަހިވެފައި ނެތުންކަން އެ ވިޔަފާރިތަކުން ފާހަގަކުރެއެވެ. 

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން ރާއްޖޭގައި މިވަގުތު 910 ގެސްޓްހައުސްއެއް އަންނަނީ ހިންގަމުންނެވެ. މި ހުރިހައި ގެސްޓްހައުސްތަކާއިއެކު ގެސްޓްހައުސްތަކުން ފަތުރުވެރިންނަށް ހިދުމަތްދޭ އެނދުގެ އަދަދަކީ 14،934 އެނދެވެ.