ރޭ ހުޅުމާލޭ ސެންޓްރަލް ޕާކު ކައިރީގައި ހިނގި ނުރައްކާތެރި އެކްސިޑެންޓްގައި ނިޔާވި، ލ. އިސްދޫ ބީޗް ހައުސް، ޙަސަން ސަމާޙް (23އ)ގެ ޖަނާޒާ ބާއްވައި ހުޅުމާލެ ސަހަރާގައި ވަޅުލައިފިއެވެ.

ސަމާޙްގެ މައްޗަށް ކަށުނަމާދުކުރުން އޮތީ، މިރޭގެ މަޣުރިބު ނަމާދަށްފަހުގައި މަސްޖިދުއް ޒައިދުބިން ޘާބިތުގައެވެ. ކަށުނަމާދުގައި ވަރަށް ގިނަ އަދަދެއްގެ މީހުން ބައިވެރިވިއެވެ. އޭގެ ތެރޭގައި މޯލްޑިވްސް ކަރެކްޝަނަލް ސަރވިސްގެ އިސްވެރިންނާއި، ކަރެކްޝަންސްގެ ގިނަ އަދަދެއްގެ އޮފިސަރުން ހިމެނުނެވެ. މޯލްޑިވްސް ކަރެކްޝަނަލް ސަރވިސްގެ ޕްރިޒަން ލާންސް ކޯޕްރަލްގެ މަޤާމުގައި ހުރި ޙަސަން ސަމާޙް އެ ސަރވިސްގެ ވަޒީފާގައި ޚިދުމަތް ކުރަން ފަށާފައިވަނީ، 2021 ޖެނުއަރީ މަހުން ފެށިގެންނެވެ.

ލ. އިސްދޫ ބީޗް ހައުސް، ޙަސަން ސަމާޙް (23އ) --

ސަމާޙް ނިޔާވީ ހުޅުމާލެ ސެންޓްރަލް ޕާކުގައި ރޭ ބޭއްވި މެރެތަންއެއްގައި ބައިވެރިވުމަށް އިތުރު މީހަކާއި އެކު ސައިކަލުގައި އެސަރަހަށްދަށް ދަނިކޮށް، އޭނާ ދުއްވި ސައިކަލުގައި، ބާރު ސްޕީޑުގައި ދުއްވާފައި އައި ސްޕޯޓް ކާރަކުން ޖެހުމާއި ގުޅިގެންނެވެ. ފުލުހުންގެ އިދާރާއިން ހާމަކުރައްވާފައިވާ ގޮތުގައި މިހާދިސާ ހިނގާފައި ވަނީ ރޭގެ 2:48 ގައެވެ. ސަމާޙް ނިޔާވީ އޭނާއަށް ލިބުނު ޒަޚަމްތަކަށް ހުޅުމާލެ ހޮސްޕިޓަލްގައި ފަރުވާދެމުން ދަނިކޮށެވެ.

ސަމާޙްގެ އާއިލާގެ މީހުންގެ ފަރާތުން މައުލޫމާތު ލިބުނު ގޮތުގައި، މަގުމަތީގެ އެކްސިޑެންޓެއްގައި ސަމާޙް ކުއްލި ގޮތަކަށް ނިޔާވި އިރު، އޭނާ އައީ މިއަހަރުގެ ޑިސެމްބަރު މަހު އޭނާގެ އަލަތު ކައިވެންޏަށް ތައްޔާރު ވަމުންނެވެ.