ފުވައްމުލައް ސިޓީ އަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ކުރެއްވި ރިޔާސީ އިންތިޚާބުގެ ކެމްޕޭން ދަތުރުފުޅާ ގުޅިގެން ރޭ ބޭއްވި ޖަލްސާގައި ފުވައްމުލައް ސިޓީއަށް މި ފަސް އަހަރު ތެރޭގައި ގެނެވުނު ތަރައްޤީއާއި ހިންގުނު މަޝްރޫޢުތަކާ ގުޅޭގޮތުން ނައިބުރައީސް ފައިސަލް ނަސީމް ވަނީ ވާހަކަފުޅު ދައްކަވާފައެވެ.

ފުވައްމުލައް ސިޓީގައި ފާއިތުވި ސަރުކާރުތަކުގައި ހިންގުނު މަޝްރޫޢުތަކަށް ބަލާއިރު 2009-2011 އަށް ހިންގާފައިވަނީ 14 މަޝްރޫޢެކެވެ. 2014-2018 އަށް ހިންގާފައިވަނީ 13 މަޝްރޫޢެކެވެ. ނަމަވެސް، މި ސަރުކާރުގައި 2019-2023 އަށް 40 މަޝްރޫޢެއް ހިންގާފައިވެއެވެ. މި މަޝްރޫޢުތަކަށް ޖުމްލަ 447.6 މިލިއަން ރުފިޔާ ހޭދަކޮށްފައިވެއެވެ.

ޖަލްސާގައި ވާހަކަފުޅު ދައްކަވަމުން ނައިބުރައީސް ފައިސަލް ނަސީމް ވިދާޅުވީ ކޮންމެ ފިކުރެއްގެ ކޮންމެ ވިސްނުމެއްގެ މީހުން ރަށުގައި އުޅުނު ކަމުގައިވިއަސް އެންމެން ވެސް ބޭނުންވަނީ ރަށެއް ތަރައްޤީވުން ކަމުގައާއި، މިއީ 13،000 އަށްވުރެ ގިނަ ރައްޔިތުންނާ ގުޅިފައިވާ ކަމެއް ކަމުގައި ވާއިރު މިކަމާ ޝުކުރުވެރި ނުވާނީ ކާކު ކަމުގައިތޯއެވެ.

ރައީސް އިބްރާހީމް މުޙައްމަދު ޞާލިޙްގެ ކުރިއަށް އޮތް ފަސް އަހަރުތެރޭގައި ފުވައްމުލަކުގައި ހިންގުމަށް ރާވާފައިވާ ބިޔަ ބޮޑު މަޝްރޫޢުތައް ވެސް ރޭގެ ޖަލްސާގައި ވަނީ އާއްމުކުރައްވާފައެވެ. އެގޮތުން ބަނދަރު ބޮޑުކުރުން، އެއަރޕޯޓް ބޮޑުކޮށް ތަރައްޤީކުރުން، އައިޓީ އަދި ޓިވެޓް ސެންޓަރެއް ގާއިމްކުރުން، މަލްޓި ޕަރޕަސް އޮފީސް ކޮމްޕްލެކްސްއެއް ގާއިމްކުރުން އަދި ކުޑަކުދިންނަށް ހާއްސަ ހޮސްޕިޓަލަކަށް ފުވައްމުލަކު ހޮސްޕިޓަލް ހެދުން ހިމެނެއެވެ.