ގަވާއިދާ ހިލާފަށް އުޅޭ ބިދޭސީން ފުޅާދާއިރާއެއްގައި ވިޔަފާރިއަށް އެކި ކަހަލަ ކާބޯތަކެތި ތައްޔާރުކުރަމުންދާ ތަނެއް ބަލައި ފާސްކޮށް، 10 ބިދޭސީއަކު ވަނީ އިމިގްރޭޝަން ބެލުމުގެ ދަށަށް ގެންގޮސްފިއެވެ.

އިމިގްރޭޝަނުން ހާމަކުރައްވާފައިވާ ގޮތުގައި، ގަވާއިދާ ހިލާފަށް އުޅޭ ބިދޭސީން ފުޅާދާއިރާއެއްގައި ވިޔަފާރިއަށް އެކި ކަހަލަ ކާބޯތަކެތި ތައްޔާރުކުރަމުންދާ ކަމަށް "އިމިގްރޭޝަން ވޮޗް" އަށް ލިބުނު މައުލޫމާތާ ގުޅިގެން ފުލުުހުންނާއި އެކު ހޯމަ ދުވަހު ހިންގި އޮޕަރޭޝަނުގައި، ބަލައި ފާސްކޮށްފައި ވަނީ، މ. ތްރީ މޫން ގެއެވެ. 

އެގެ ބަލައި ފާސްކުރި އިރު، ސާފުތާހިރު ކަމުގެ މިންގަނޑަށް ނުފެތޭ ގޮތަށް، އަދި ޤަވާއިދުން ނަގަންޖެހޭ ހުއްދަތައްވެސް ނުނަަގައި ގިނަ އަދަދެއްގެ ކާބޯތަކެތި ދިޔައީ ތައްޔާރުކުރަމުންދިޔަކަން އެނގިފައިވެއެވެ. އެގޮތުން ތެލުލިފަތާއި ކުދި ގުޅަ އާއި، ރިހާކުރު ޗިޕްސް ފަދަ ބާވަތްތައް ތައްޔާރުކޮށް ޕެކެޓްކޮށްފައި ހުއްޓައި ވަނީ ފެނިފައެވެ.

މީގެ އިތުރުން ތެލުލަން ތައްޔާރުކޮށްފައިވާ ފުށްގުޅަ ތަކެއްގައި ދައު މުންޑެއް އަޅައި ނިވާކޮށްފައި ވަނިކޮށްވެސް ވަނީ ފެނިފައެވެ.

ސާފުތާހިރުކަން ކުޑަކޮށް ބިދޭސީން ކާބޯތަކެތި އުފައްދަމުންދާއިރު، ކާބޯތަކެތި ތެލުލުމަށް، ރިޒޯޓުތަކުން ބޭނުންކޮށްފައި އުކާލާ ކައްކާތެޔޮ ބޭނުންކުރާ ކަމަށްވެސް ބެލެވިފައި ވެއެވެ.

އިމިގްރޭޝަނުން ފަށާފައި އޮޮޕަރޭޝަނުގައި ޤަވާއިދާއި ޚިލާފަށް ރާއްޖޭގައި އުޅޭ ބިދޭސީން ހޯދުމުގެ އިތުރުން އެމީހުން ހިންގަމުންދާ ޤަވާއިދާ ޚިލާފު ވިޔަފާރިތައްވެސް ދަނީ ހުއްޓުވަމުންނެވެ.