މާލޭ މަޖީދީމަގުގައި ހުރި ރެޑްވޭވް ފިހާރައިން މީގެ 2 އަހަރު ކުރިން ސެންޓްފުޅިއެއް ވަގަށް ނެގި މީހަކު 1 މަހަށް ޖަލަށްލުމަށް ކްރިމިނަލްކޯޓުން ޙުކުމްކޮށްފިއެވެ.

އިއްޔެ ކްރިމިނަލް ކޯޓުން މިޙުކުމް އިއްވާފައި ވަނީ، ޏ. ފުވައްމުލަކު، ހޯދަނޑު އަވަށު، ދުންނިކަގޭ މުހައްމަދު ޙަނީޝް ޙަފީޡުގެ މައްޗަށެވެ. ދައުލަތުން އޭނާގެ މައްޗަށް ދައުވާ އުފުލީ، އޭނާ ރެޑްވޭވް ފިހާރައިން ވައްކަން ކުުރިތާ ދޮޅު އަހަރު ފަހުން ހުސްވި އަހަރުގެ އޮގަސްޓް މަހުގެ 29 ވަނަ ދުވަހުގައެވެ. އޭނާ އެވައްކަން ކުރި ކަމަށް ދައުލަތުން ކޯޓުގައި ބުނެފައި ވަނީ 10 މާރިޗު 2022 ގައެވެ.

މުހައްމަދު ޙަނީޝް ޙަފީޡުގެ މައްޗަށް ދައުލަތުން އުފުލާފައިވާ ދައުވާގައި ބުނެފައި ވަނީ، އޭނާ މަޖީދީމަގުގައި ހުންނަ ރެޑްވޭވް މޯލް ފިހާރައިން  ޕެންޑޯރާ ބްރޭންޑްގެ ފްލޯސަމް ސެންޓް ފުޅިއެއް ވަގަށް ނަގާފައިވާ ކަމަށެވެ. އެވައްކަމާއި ގުޅިގެން އޭނާގެ މައްޗަށް ކަނޑައެޅި އަދަބަކީ، 2 މަހާއި 12 ދުވަހަށް ޖަލަށްލުން ކަމަށް ވީނަމަވެސް، އޭނާ ފުުލުހުންގެ ބަންދުގައި، 35 ދުވަސް ހޭދަކޮށްފައި ވާތީ، ކްރިމިނަލް ކޯޓުން ނިންމާފައި ވަނީ އޭނާ 1 މަހާއި 7 ދުވަހަށް ޖަލަށް ލުމަށެވެ.