އުތުރުގެ އަތޮޅުތަކަށް މިހާރު ކުރަމުންދާ ވިއްސާރައިގައި ހދ. ކުޅުދުއްފުށީގެ 57 ގެއަކަށް ފެންވަދެ ގެއްލުންތައް ލިބުމާއި ގުޅިގެން، 5 ގެެއަކުން މީހުން ބަދަލުކުރަން ޖެހިފައިވާ ކަމުގައި، ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ވިދާޅުވެއްޖެއެވެ.

އެ އޮތޯރިޓީން ވިދާޅުވީ، އުތުރުގެ އަތޮޅުތަކަށް ރޭ ކުރި ވިއްސާރައިގައި، ކުޅުދުއްފުށީގެ އިތުރުން، ހއ. ހޯރަފުށީގެ 2 ގެއަކަށާއި، ށ.ފީވަކުގެ 5 ގެއަކަށް އަދި ށ.ނޫމަރާގެ 5 ގެއަކަށް ފެން ވަދެ ގެއްލުންތައް ލިބިފައިވާ ކަމަށެވެ. 

އުތުރުގެ އަތޮޅުތަކަށް މިހާރު ކުރަމުންދާ ވިއްސާރަ އާއި ގުޅިގެން މޫސުމާއި ބެހޭ ޤައުމީ އިދާރާއިން އެސަރަހައްދަށް ރޭ އޮރެންޖެ އެލާޓްވެސް ނެރުނެވެ.

ހުޅަނގު މޫސުމްގެ ބާރު ގަދަވެ ރާއްޖެއަށް ކުރަމުންދާ ވިއްސާރައިގައި މިދިޔަ ހަފްތާގައި މާލޭގައިވެސް ފެންބޮޑުވެ، ބޮޑެތި ގެއްލުންތަކެއް ލިބުނެވެ. މިގޮތުން، މާލެއިން އެކަނިވެސް،  އިމާރާތަށާއި ހިފާ ގެންގުޅޭ ތަކެއްޗަށް -/819،549ރ ގެ ގެއްލުން ލިބުނުކަމުގައި އެންޑީއެމްއޭ އިން ހާމަކުރައްވާފައިވެއެވެ.