ބުޅާ މަސް އަޅައިގެން ކާއެއްޗެހި ހަދައިގެން ވިއްކި ކަމަށް ތުހުމަތު ކުރެވުނު ޢަރަފާތު އިއްޔެ އިމިގްރޭޝަނާއި ހަވާލުކޮށްފައިވާ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން މިއަދު މީޑިއާތަކަށް ފޮނުވި މެސެޖުގައި ވިދާޅުވީ، އެ ބަނގުލަދޭޝްގެ ރައްޔިތެއް ކަމަށްވާ، އަރަފާތު ޙުސައިން (32އ) މާލެއިން އިއްޔެ ހެނދުނު ހައްޔަރު ކުރުމަށްފަހުގައި އޭނާ، އިއްޔެ އިމިގްރޭޝަނާއި ހަވާލުކޮށްފައި ކަމަށެވެ. އެހެން ނަމަވެސް އޭނާ އިމިގްރޭޝަނާއި ހަވާލުކުރި ސަބަބެއް ފުލުހުންގެ އިދާރާއިން ވިދާޅެއް ނުވެއެވެ. އޭނާ އާއި ދެކޮޅަށް، ޖަނަވާރާއި ބެހޭ މިނިސްޓްރީންވެސް ވަނީ ފުލުހުންނަށް މައްސަލަ ހުށައަޅާފައެވެ.

ރާއްޖޭގައި ދިރިއުޅޭތާ ގިނަ ދުވަސްތަކެއް ވެފައިވާ ޢަރަފާތު ޙުސައިނަކީ، ޤަވާއިދާއި ޚިލާފަށް ބަދިގެއެއް ހަދައި ފުޅާ ދާއިރާއެއްގައި ބިދޭސީންނަށް ކާބޯތަކެތި ވިއްކަމުން އައި މީހެކެވެ. އަދި ކަންމަތީ ފިހާރަތަކާއި ބިދޭސީން ހިންގާ ސައިކަޑަތަކަށް އޭނާ، ސަބްމެރިން އާއި ބާގާ ފަދަ ތަކެތި ހަދައިގެން ގެންގޮސް ވިއްކާއިރު، އެތަކެއްޗަށް ބުޅާ މަސް އަޅާފައިވާ ކަމުގެ ތުހުމަތުތައް ވަނީ ކުރެވިފައެވެ.

އޭނާ ދިރިއުޅޭ ގޭގެ ތެރޭގައި ބުޅާ ގެންގުޅުނު ކަމާއި، އަދި ކަތިލައި މަރާފައިވާ ބުޅަލުގެ ހަށިގަނޑުގެ ބައިތައް އެގޭގެ ކައިރިން ފެނިފައިވާ ކަމުގައިވެސް ސޯޝަލް މީޑިއާގައި އާއްމުން ރިޕޯޓްކޮށްފައި ވެއެވެ. އަދި މަގުމަތީގައި އޭނާ ބުޅާ ހިފަން އުޅޭ މަންޒަރުފެންނަ ވީޑިއޯތަކެއްވެސް ސޯޝަލް މީޑިއާގައި އާއްމުވެފައި ވެއެވެ.