ބްރެންޓްފޯޑަށް އިތުރަށް ކުޅެން ބޭނުންނުވާތީ، އެ ކްލަބު އާދީއްތަ ދުވަހު ކުޅުނު މެޗުން ބާކީ ކުރި އިންގްލެންޑްގެ ސްޓްރައިކަރ، އިވާން ޓޯނީ ގެންދިއުމަށް ސައުދީ ޕްރޯ ލީގުގެ އަލް-އަހްލީ ފުރަތަމަ ހުށަހެޅި 35 މިލިއަން ޕައުންޑު ރިޖެކްޓު ކުރުމުން، އެ ކްލަބުން އެ އަގު ބޮޑު ކުރުމަށް މަސައްކަތް ކުރަމުންދާއިރު، ޓޯނީ ބުނީ އޭނާ ބޮޑު މުސާރައެއް ބޭނުންވާ ކަމަށެވެ.

އުމުރުން 28 އަހަރުގެ ޓޯނީ ބޭނުންވަނީ މުސާރައިގެ ގޮތުގައި އަހަރަކު މަދުވެގެން 17 މިލިއަން ޕައުންޑެވެ. މީގެ އިތުރުން، ބޯނަސްތަކާއި، އެކަމަޑޭޝަން ފީ އަކީ ވެސް އޭނާގެ ޑިމާންޑެކެވެ.

އަލް-އަހްލީ އިން އައު ސީޒަނަށް ފުރަތަމަ ބިޑް ހުށަހެޅީ ޓޮޓްނަމްގެ ބްރެޒިލް ސްޓްރައިކަރ، ރިޗާލިސަންއަށެވެ. ނަމަވެސް ރިޗާލިސަން ގެންދިއުމަށް އަލް-އަހްލީ އިން ހުށަހެޅި 50 މިލިއަން ފައުންޑަށް ޓޮޓްނަމް އިން އެއްބަސްވެފައެއް ނުވެއެވެ. އޭގެ ފަހުން، އެމީހުން އަމާޒު ހިފީ ޓޯނީ އަށެވެ.

އަލް-އަހްލީގައި މިހާރު ވެސް މަޝްހޫރު ގިނަ ކުޅުންތެރިންތަކެއް ހިމެނެއެވެ. އޭގެ ތެރޭގައި ބޮބީ ފަމީނިއޯ، ރިޔާދު މަހްރެޒް އަދި އެޑުއާޑޯ މެންޑީ ހިމެނެއެވެ. މި ކުޅުންތެރިންނާއެކު، އަހްލީ މިދިޔަ ސީޒަން ނިންމާލީ، އަލް-ހިލާލް އާއި ރޮނާލްޑޯގެ އަލް-ނަސްރުގެ ފަހަތުން، ތިން ވަނައިގައެވެ.

ޓޯނީ އާއި ބްރެންޓްފޯޑުގެ މެނޭޖަރ ވެސް ބޭނުންވަނީ ޓްރާންސްފާ ވިންޑޯ އޯގަސްޓު 31 އަށް ބަންދުވުމުގެ ކުރިން ރަނގަޅު ހުށަހެޅުމަށް ހޯދައި، ޓޯނީގެ ޓްރާންސްފާ ނިންމުމަށެވެ.