ރާއްޖޭގެ ވެރިރަށް މާލޭގައި ހަލުވިކަމާއިއެކު ބުރާސްފަތި ދުވަހުގެ ރެއިން ފެށިގެން ފެތުރެމުންދާ ހޮޑުލުމާއި ބޮޑުކަމުދިއުމުގެ ރޯގާގެ ގިނަ ކޭސްތަކެއް ރިޕޯޓް ކުރަމުން އަންނަކަމަށް، ހެލްތް ޕްރޮޓެކްޝަން އެޖެންސީއިން ވަނީ މިއަދު ހާމަކޮށްފައެވެ. އަދި މި ރޯގާއާއި ގުޅިގެން މާލެ ސަރަހައްދުގެ އެސްޓީއޯގެ ބޭސް ފިހާރަތަކުން ބޭސް ގަންނަ މިންވަރު އިތުރުވެފައިވާކަމަށް އެ ކުންފުނިން ވަނީ ބުނެފައެވެ.

އެގޮތުން މިހާރު ފެތުރެމުންދާ ރޯގާފަދަ ރޯގާތަކަށް އާއްމުކޮށް ދެވޭ ބޭސްތަކުގެ ޑިމާންޑް އިތުރުވެފައިވީނަމަވެސް، އެސްޓީއޯއިން އެތެރެކުރާ ބޭސްތައް ލިބުމުގައި ދަތިކަމެއް ނެތްކަމަށް އެކުންފުނިން ވަނީ މިއަދު ޔަގީންކޮށްދީފައެވެ.

އެސްޓީއޯއިން އިތުރަށް ފާހަގަ ކޮށްފައިވާ ގޮތުގައި އެ ކުންފުނިން ބޭސް އެތެރެކުރަމުންދަނީ ސިއްހީ ޚިދުމަތްދޭ ފަރާތްތަކާއި ދައުލަތުގެ ކަމާގުޅޭ މުއައްސަސާތަކާ މަޝްވަރާކުރެވިގެން ރާއްޖެއަށް ބޭނުންވާނެ މިންވަރު ދެނެގަނެވި، އިސްރާފުވެސް ކުޑަވާނެ ގޮތަށް ބަލައި އަދި ބޭހުގެ ފެންވަރާމެދު ސުވާލެއްވެސް ނުއުފުދޭ މިންވަރަށް ބަލައިގެން ކަމަށެވެ. އަދި ރާއްޖޭގައި މޫސުމީ ރޯގާތަށް ފެތުރޭ ދުވަސްވަރުތައް އެކުންފުނިން ދެނެގަނެފައިވާ ކަމަށާއި، އެ ދުވަސްވަރަށް ބޭނުންވާ ބޭސްތައް އަބަދުވެސް ހުސްނުވެ އެ ކުންފުނިން ފޯރުކޮށްދެވެމުން ދާނެކަމުގައި އެ ކުންފުނިން ބުނެއެވެ.

ހަލުވިކޮށް ފެތުރެމުންދާ މި ރޯގާ އާއި ގުޅިގެން ހުޅުމާލޭ ސެންޓްރަލް ޕާކުގައި ބޭއްވުމަށް ކުރިން ހަމަޖެހިފައި އޮތް މިނިވަން އުފާ ކާނިވާ ވެސް ވަނީ ފަސް ކޮށްފައެވެ.