Advertisement
ރައީސް ޞާލިޙަކީ ރައްޔިތުންގެ އަޑުއަހާ ރައީސެއް: މެންބަރު އިސްމާއިލް އަޙްމަދު
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙްގެ ފަސް އަހަރުގެ މިދައުރަކީ ރާއްޖޭގެ އެކި ހިސާބުތަކުގައި އަދި އަތޮޅުތަކުގައިވާ ތަރައްޤީގެ ފަރަގު ބޮޑު ތަނުން ކުޑަކޮށް, ރައްޔިތުންގެ ވިންދާ އެއްގޮތަށް, ރައްޔިތުންގެ އަޑު އަހައިގެން ރައްޔިތުން ބޭނުންވާ ގޮތަށް ހިންގާފައިވާ ފަސް އަހަރު ކަމުގައި ދުވާފަރު ދާއިރާގެ އިއްޒަތްތެރި މެންބަރު އިސްމާއިލް އަޙްމަދު ވިދާޅުވެއްޖެއެވެ. މެންބަރު އިސްމާއިލް އަޙްމަދު މިހެން ވިދާޅުވީ "ނޫން" އަށް ދެއްވި ޙާއްސަ އިންޓަވިއުއެއްގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙްގެ މިދައުރު ކުރު ގޮތަކަށް ސިފަކޮށްދެއްވަމުންނެވެ.
އެގޮތުން ރައްޔިތުންގެ އަޑުއަހާ ރައީސެއްކަން ހެކިކޮށްދޭ އެއްކަމަކީ ސަރުކާރުގެ ފަރާތުން ކުރިއަށް ގެންދަން ރާވާ މަޝްރޫޢުތައް އާންމު ކުރާ ހިސާބުން ވެސް ރައްޔިތުންގެ ކަންބޮޑުވުން އުފެއްދުމުން, އެކަންބޮޑުވުމާ އެއްކޮޅަށް ދީއްލާލާ އެބަދަލުތައް ގެނެސްގެން, މަޝްރޫޢުތައް ތަންފީޒީ މަރުހަލާއަށް ދާއިރު ރައްޔިތުން އެދޭ ގޮތަށް ކަންކަން ފަހިކުރަން މަސައްކަތްކޮށްފައިވާ ބޭފުޅެއްކަމެވެ.
މިކަމާ ގުޅޭ ގޮތުން މިސާލު ޖައްސަވަމުން މެންބަރު އިސްމާއިލް އަޙްމަދު ވިދާޅުވީ ސަރުކާރުގެ ފަރާތުން ރައްޔިތުންގެ މަޖުލީހަށް ހުށައެޅުއްވި ނަފުރަތުގެ ބިލުގައި ހުރި ކަންކަމާއި މެދު ރައްޔިތުންގެ ފަރާތުން ނަފްރަތު ފާޅުކުރުމާ, އެކިއެކި ފަރާތްތަކުން ފިއްތުންތައް ކުރިމަތި ކުރައްވަމުން ގެންދެވި އިރު ވެސް ރައްޔިތުން އެދޭ ގޮތަށް އެބިލު ފާސް ކުރަން މަސައްކަތް ކޮށްދެއްވާނެކަން ރައީސް ޞާލިހް ވިދާޅުވިކަމެވެ. އަދި ސަރުކާރުގެ ތެރެއިން ފިއްތުންތައް އޮވެމެ, ރައްޔިތުން ބޭނުންވާ ގޮތަށް އެބިލު ފަރުމާވެ ޤާނޫނަކަށް ބަދަލުވެގެން ގޮސްފައިވާކަން މެންބަރު އިސްމާއިލް އަޙްމަދު ފާހަގަކުރެއްވިއެވެ. ސަރުކާރުން ރާވާ ހިންގާ މަޝްރޫޢުތަކުގައި ރައްޔިތުން ޑިމާންޑެއް ކޮށްފިނަމަ އެއަށް އިތުރު ހޭދައެއް ކުރަން ޖެހުނުކަމުގައި ވިޔަސް ރައްޔިތުން އެދޭ ގޮތަށް, އެޕްރޮޖެކްޓެއްގެ ބޭނުން ހިފަން ތިބޭ ރައްޔިތުން ބޭނުންވާ ގޮތަށް ނިންމެވުމަށް ރައީސް ޞާލިޙަކީ ވަރަށް ބޮޑަށް ސަމާލުކަން ދެއްވާ ބޭފުޅެއްގެ ގޮތުގައި މެންބަރު އިސްމާއިލް އަޙްމަދު ސިފަކުރެއްވިއެވެ.
ޖުމުލަ ގޮތެއްގައި ރައީސް އިބްރާހިމް މުޙައްމަދު ޞާލިޙާއި އެހެނިހެން ރައީސުންނާ ހުރި އެންމެ ބޮޑު އެއް ތަފާތުގެ ގޮތުގައި މެންބަރު އިސްމާއިލް އަޙްމަދު ވިދާޅުވީ މިރައީސަކީ އެންމެ ތިރިން ފެށިގެން, އާންމު ރައްޔިތު މީހާގެ އަޑު އަހައިގެން ވެރިކަން ކުރައްވާ, ދޫ ދެއްވަން ޖެހޭ ތަންތަނުގައި ދޫ ދެއްވައިގެން ވެރިކަން ކުރަން ފަރިތަ ބޭފުޅެއް ކަމާއި, މިއިން ޒަމާނަކު ރާއްޖެ ނުދެކޭ ވަރަށް އަތޮޅުތަކުގެ ތެރޭގައި ތަރައްޤީގެ ކަންކަން މިހާރު 'މެކުހަށް' ޖަހާފައި އޮތްކަމަށް މެންބަރު އިސްމާއިލް އަޙްމަދުގެ ވާހަކަފުޅުގައި ފާހަގަކުރެއްވިއެވެ.
މީގެ އިތުރުންވެސް ރައީސް އިބްރާޙިމް މުޙައްމަދު ޞާލިޙުގެ މިވެރިކަމުގައި މުޅި ދުނިޔެއަށް ދިމާވި އާލަމީ ވަބާގެ ގޮތުގައި ސިފަކުރައްވާ, ކޯވިޑް-19 ގެ ބަލިމަޑުކަމުގައި ތެރޭގައިވެސް ރައީސް ވައުދުވެ ވަޑައިގެންނެވި ކަންކަން ކުރުމުގައި ދިމާވި ހުރަސްތައް ގިރާކޮށް, ރައްޔިތުންނަށް ވެފަ ހުރި ވައުދުތައް ފުރިހަމަކުރެއްވުމަށްޓަކައި ރައީސް އިބްރާހިމް މުޙައްމަދު ޞާލިޙު ދެވަނަ ދައުރަކަށް ހޮވަން މުހިއްމުކަމަށް މެންބަރު އިސްމާއިލް އަޙްމަދުގެ އިންޓަވިއުގައި ވިދާޅުވިއެވެ.
އަދި މި ފަސް އަހަރު ދުވަހުގެ ތެރޭގައި ރާއްޖެއަށް އައިސްފައިވާ އަމާންކަން ސިފަކުރައްވާ މެންބަރު އިސްމާއިލް އަޙްމަދު ވިދާޅުވީ މީޑިއާތަކަށް ހިޔާލުފާޅު ކުރުމުގައި ލިބިފައިވާ މިނިވަންކަމާ, ނޫސްވެރިއަކު ބަންދުކޮށްފައި ނުވާކަމާ, ވަޒީފާތަކުގައި ތިބި ފަރާތްތަކަށް މިނިވަންކަމާއި އެކު ބަސް ބުނުމުގެ ޖާގަ އޮތް, އަދި ވަޒީފާގެ ބިރުވެރިކަމެއް ނެތް ވެރިކަމަކަށް ވާތީ މިއަމާންކަން ދެމެހެއްޓުމަށްޓަކައި ރައީސް ޞާލިޙަށް ދެވަނަ ދައުރެއް މުހިންމުކަމަށެވެ.
އަދި ރާއްޖޭގެ އިޤްތިޞާދު ހަމައަކަށް އަޅުވާ, ރަށްރަށުގައި ހުރި އަސާސީ ކަންކަމާ ތަރައްޤީގެ ކަންކަން މެދު ނުކެނޑި ހިންގުމަށާ ރާއްޖޭގެ ހަމަޖެހުމާއި އަމާންކަން ދެމެހެއްޓުމަށްޓަކައި ވެސް ދެވަނަ ދައުރަކަށް ރައީސް އިބްރާހިމް މުޙައްމަދު ޞާލިޙް ހޮވުމަކީ އިންތިހާއަށް މުހިންމު ސަބަބެއްކަމަށް މެންބަރު އިސްމާއިލް އަޙްމަދު ފާހަގަކުރައްވާފައިވެއެވެ.
