ސަރުކާރުން ލޭނުގެ މަސްވެރިކަމަށް ހުއްދަ ދިނުމަށް ކުރަމުން އަންނަ މަސައްކަތްތަކާއި ދެކޮޅުކަން ރައީސް ނަޝީދުވެސް ހާމަކުރައްވައިފިއެވެ.

ސަރުކާރުން ވަނީ، ލޭނު މަސްވެރިކަން ކުރުމުގެ ޤަވާއިދަށް ޚިޔާލު ހުށައެޅުމުގެ ފުރުޞަތު ހުޅުވާލާފައެވެ. އެފުރުޞަތު މާދަމާ ހަމަ ވާނެއެވެ.

ލޭނުގެ މަސްވެރިކަން ކުރުމަށް، ހުއްދަ ދިނުމަށް ކުރަމުންދާ މަސައްކަތްތާއި ދެކޮޅަށް ރައީސް ނަޝީދު ވިދާޅުވެފައި ވަނީ، އެކަމުގެ ސަބަބުން ރާއްޖޭގެ ފަތުރުވެރިކަމުގެ ސިނާޢަތަށް ގެއްލުން ލިބޭނެ ކަމަށެވެ. މިގޮތުން ލޭނުގައި އެންމަޑި އާއި ކޯމަހާއި މިޔަރު ފަދަ ނާޒުކު ހާލަތުގައި ވާ ދިރުންތައް ޖެހޭނެކަން ރައީސް ނަޝީދު ފާހަގަކުރައްވާފައިވެއެވެ. 

ލޭނުގެ މަސްވެރިކަމަށް ހުޅުވާލުމަށް ފުރުޞަތު ދިނުމަށް ސަރުކާރުން މަސައްކަތް ކުރަމުން ގެންދަނީ، ދިވެހިރާއްޖޭގެ ކަނޑުމަހުގެ މަސްވެރިކަން އިތުރަށް ތަރައްޤީކުރުމުގެ މަޤްސަދުގައި ކަމަށް ބުނެއެވެ. އަދި ރާއްޖެއިން ލޭނުއަޅައިގެން މަސްބޭނުން އިތުރު ކުރުމަށް ސަރުކާރުން ނިންމާފައި ވަނީ، އިންޑިއަން އޯޝަން ޓޫނާ ކޮމިޝަން (އައި.އޯ.ޓީ.ސީ) ރާއްޖެއަށް ކަނޑައަޅާފައިވާ ކޯޓާ އާއި އެއްވަރަށް ރާއްޖެއިން މަސް ނުބާނާތީ ކުރިޔަށް އޮތް ތަނުގައި އެ ކޮމިޝަނުން ރާއްޖެއަށް ދޭ ކޯޓާގެ އަދަދު މަދުކޮށްފާނެތީ ކަމަށްވެސް ބުނެފައިވެއެވެ.

ރާއްޖޭގައި ލޭނުގެ މަސްވެެރިކަން ފުޅާކުރުމާއި ދެކޮޅަށް ތިމާވެއްޓަށް ލޯބިކުރާ ފަރާތްތަކުންނާއި، ބޮޑު ކަންނެލީގެ މަސްވެރިކަމުގެ ސިނާޢަތުގައި މަސައްކަތް ކުރާ ފަރާތްތަކުންވެސް ދަނީ ޝުއޫރު ފާޅުކުރަމުންނެވެ.