މޯލްޑިވްސް އިމިގްރޭޝަންގެ ކޮންޓްރޯލަރ ޖެނެރަލްގެ މަޤާމުގައި ހުންނެވި މުޙައްމަދު އަޙުމަދު ހުސެއިން (ހަނަފީ) މިއަދު ދިވެހިރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އާއި ގުޅިވަޑައިގެންފިއެވެ. ހަނަފީ އާއި އެކު އާއިލާގެ 60 ވުރެ ގިނަ މެންބަރުން ވެސް ވަނީ މިއަދު އެމްޑީޕީ އާ ގުޅިފައެވެ.

ހަނަފީ އެމްޑީޕީއަށް ސޮއިކުރެއްވީ ސޯލްޓް ކެފޭ ގައެވެ، އަދި މި ރަސްމިއްޔާތުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ބައިވެރިވެވަޑައިގެންނެވިއެވެ. އެމްޑީޕީއަށް ސޮއެކުރެއްވުމަށް ފަހުގައި، ޙަނަފީ ވަނީ، އެމްޑީޕީގެ 60 ވުރެ ގިނަ މެމްބަރޝިޕް ފޯމް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި ހަވާލުކޮށްދެއްވާފައެވެ.

މިކަން އިޢުލާން ކުރައްވައި ހަނަފީ ކުރެވި ޓްވީޓެއްގައި ވިދާޅުވީ، ރައީސުލް ޖުމްހޫރިއްޔާ އިބްރާޙިމް މުޙައްމަދު ޞާލިޙް ވަނީ ފުރިހަމަ މާނައިގައި މިނިވަންކަން ޤާއިމްކޮށްދީ، ކުޑަ ރަށެއް، ބޮޑު ރަށެއް ބާކީ ނުކޮށް، ދިވެހީންގެ އަސާސީ ޚިދުމަތްތައް ކަމުގައިވާ ކަރަންޓާއި، ބަނދަރާއި، މަގާއި، ފެނާއި، ނަރުދަމާއާއި، އާރުޓީއެލް އަކީ މުޅި ރާއްޖޭގެ އިގްތިޞާދު އެތައް ގުނައަކުން ބިނާކުރެވޭ ބިންގާކަމުގައި ހައްދަވާފައިވާ ކަމުގައެވެ. އަދި ހަނަފީ އާއި ހަނަފީގެ އާއިލާއަކީ މިއަދުން ފެށިގެން ދިވެހިރައްޔިތުންގެ ޑިމޮކްރަޓިކް ޕާޓީ (އެމްޑީޕީ) މެމްބަރުން ކަމާއި، ދިވެހީންނަށް ރައީސް އިބްރާޙިމް މުޙައްމަދު ޞާލިޙް ހޯއްދަވައިދެއްވާފައިވާ އުފާވެރި އަމާން ރާއްޖެ މިގޮތުގައި ދަމަހައްޓާ، ޤައުމު ބިނާ ކުރެއްވުމުގައި އެމަނިކުފާނު ގެންގުޅުއްވާ ވަށާޖެހޭ ސިޔާސަތުތައް ތަންފީޒުކުރުމަށް މިއަދުން ފެށިގެން މަސައްކަތް ކުރައްވާނެ ކަމުގައި ވިދާޅުވިއެވެ. އަދި ނިންމާލަމުން، ކުރިއަށް އޮތް ރިޔާސީ އިންތިހާބު އިރާދަކުރެއްވިއްޔާ ރައީސް އިބްރާޙިމް މުޙައްމަދު ޞާލިޙްއަށް އެއްބުރުން ކާމިޔާބު ކުރެއްވޭނެކަމަށް ވިދާޅުވެފައިވެއެވެ.

މިސަރުކާރުގައި ޙަނަފީ ހުންނެވީ، ކޮންޓްރޯލަރ ޖެނެރަލް އޮފް އިމިގްރޭޝަންގެ މަޤާމުގައެވެ. އެމަޤާމަށް ރައީސުލްޖުމްހޫރިއްޔާ ހަނަފީ އައްޔަނުކުރައްވާފައި ވަނީ، 23 ޑިސެމްބަރު 2018ގައެވެ.