އިންޑިއާގެ ފޮރިން މިނިސްޓަރ ޑރ. އެސް ޖައިޝަންކަރު، އެމްޑީޕީގެ ރައީސް ޢަބްދުﷲ ޝާހިދާއި ބައްދަލުކުރައްވައިފިއެވެ.

މި ބައްދަލުކުރެއްވުފަހުގައި އެމްޑިޕީގެ ރައީސް ޢަަބުދުﷲ ޝާހިދު އާއްމު ކުރެއްވި ބަޔާނުގައި، ރާއްޖެއަށް ދިމާވާ ކޮންމެ ބޮޑުކަމެއްގައި އެންމެ ގާތުން އެހީވާ ޤައުމަކީ އިންޑިއާކަން ފާހަގަކުރައްވައި ޝުކުރު އަދާކުރެއްވިއެވެ. 

ދެބޭފުޅުންގެ މިބައްދަލުވުމުގައި މައިގަނޑު ގޮތެއްގައި މަޝްވަރާކުރައްވާފައި ވަނީ، ރާއްޖެއާ އިންޑިއާގެ ގުޅުން ކުރިއަށް އޮތްތަނުގައި ބަދަހިކޮށް ކުރިއެރުވޭނެ ގޮތްތަކާއި ގުޅޭ ގޮތުން ކަމުގައިވެސް ދެބޭފުޅުންގެ ފަރާތްޕުޅުން ނެރުއްވާފައިވާ ބަޔާނުގައި ފާހަގަކުރައްވާފައިވެއެވެ.

އެމްޑީޕީގެ ރައީސް ޢަބުދުﷲ ޝާހިދުގެ ބަޔާނުގައި، މިސަރުކާރުން ވެރިކަމަށް އައުމަށް ހިންގި އިންޑިއާއި ދެކޮޅު ހަރަކާތްތަކާއި އަދި ވެރިކަމުގެ ފުރަތަމަކޮޅު އިންޑިއާއިން ރާއްޖެއަށް ބުލީ ކުރާކަމަށް ދެއްކެވި ވާހަކަތަކުގެ ސަބަބުން، ބައިނަލް އަޤުވާމީ މުޖުތަމަޢުގައި ރާއްޖޭގެ ނަން ކިލަނބުވެ، އިޤުތިޞާދީ ގޮތުންނާއި، އެނޫން ގޮތް ގޮތުންވެސް ރާއްޖެއަށް ގެއްލުންތަކާއި ކުރިމަތިލާން ޖެހުނުކަން ވަނީ ފާހަގަކުރައްވާފައެވެ.

މީގެ އިތުރުން އިންޑިއާ އައުޓް ސިޔާސަތު ރައީސް މުއިއްޒުގެ ސަރުކާރުން ބަދަލުކޮށްފައިވާތީ އެކަމަށް މަރުޚަބާ ވިދާޅުވާކަމުގައިވެސް އެމްޑީޕީގެ ރައީސް ޢަބުދުﷲ ޝާހިދު އާއްމު ކުރެއްވި ބަޔާނުގައި ވަނީ ވިދާޅުވެފައެވެ.