އިޒްރޭލުން ކޮންމެ ދުވަހަކު ޣައްޒާގެ އާއްމުންގެ ތެރެއިން އެތައް ބަޔަކު މަރަމުން ގެންދާއިރު، ޢަރަބި ލީޑަރުން ތިއްބެވީ ކުޅިބަލަން ކަމުގައި ވިދާޅުވެ، ކުރީގެ ރައީސުލްޖުމްހޫރިއްޔާ އަލްއުސްތާޛު މައުމޫނު އަބްދުލްޤައްޔޫމް އަރަބި ޤައުމުތަކުގެ ލީޑަރުންނަށް ފާޑުވިދާޅުވެއްޖެއެވެ.

ރައީސް މައުމޫނު ދިވެހިބަހުން އެމަނިކުފާނުގެ އެކްސް އެކައުންޓުގައި ލިޔުއްވި ޕޯސްޓުގައި ވިދާޅުވީ، ކޮންމެ ދުވަހަކު އެތައް ސަތޭކަ ކުށެއް ނެތް ޣައްޒާގެ އާންމުންނެއް އިސްރާއީލުން އެދަނީ ރަހުމެއްނެތި މަރަމުން ކަމަށާއި، އަރަބި ލީޑަރުން އެތިބީ ކުޅިބަލަންކަމަށެވެ. އަދި ޢަރަބި ލީޑަރުން އެކަމާއި ދެކޮޅަށް އެއްވެސް ކަމެއް ނުކުރެއްވައި ތިއްބެވުމަކީ، ހިތާމައިގެ ކޮޅެއްވެސް ނެތްކަމެއްގެ ގޮތުގައި އެމަނިކުފާނު ވަނީ ފާހަގަކުރައްވާފައެވެ.

އިޒްރާއީލުން 8 އޮކްޓޫބަރު 2023އިން ފެށިގެން ޣައްޒާއަށް ދެމުންގެންދާ ހަމަލާތަކުގައިމިހާތަަނަށް 40،000 އެއްހައި ފަލަސްޠީނުގެ ރައްޔިތުން ވަނީ ޝަހީދުކޮށްލާފައެވެ. އަދި ލައްކައަކަށްވުރެ ގިނަ މީހުން ވަނީ ޒަޚަމްކޮށްލާފައެވެ.

ރައީސް މައުމޫނުގެ ޒަޢާމަތުގައި ދިވެހިރާއްޖެއާއި ފަލަސްޠީނާއި ދެމެދު ގާތްގުޅުންތަކެއް ބޭއްވިއެވެ. އަދި އެމަނިކުފާނުގެ ވެރިކަމުގައި، ފަލަސްޠީނުގެ ރައީސް ޔާސިރު އަރަފާތުވެސް ރާއްޖެއަށް ވަޑައިގެންނެވިއެވެ. އިޒްރޭލުން ފަލަސްޠީނުގެ ރައްޔިތުންނާއި ދެކޮޅަށް ހިންގަމުންދާ ޤަތުލްޢާއްމަށް ވާގިދޭ ޤައުމުތަކަކީ، އެމެރިކާ އާއި އިނގިރޭސި ވިލާތެވެ.