އިންޑިއާގެ އެގްޒިމްބޭންކްގެ ލައިން އޮފް ކްރެޑިޓްގެ ދަށުން، ރާއްޖޭގެ 34 ރަށެއްގައި ހިންގަމުންގެންދާ ފެނާއި ނަރުދަމާގެ މަޝްރޫޢުތަކުގެ ތެރެއިން، 28 ރަށެއްގެ މަޝްރޫޢުތައް ނިމި، ރަސްމީ ގޮތުން މިއަދު ދިވެހި ސަރުކާރާއި ހަވާލުކޮށްފިއެވެ.

މިރަސްމިއްޔާތު ބާއްވާފައި ވަނީ މިއަދު މެންދުރު ރައީސުލްޖުމްހޫރިއްޔާގެ އޮފީހުގައެވެ. މިރަސްމިއްޔާތުގައި،  އިންޑިއާގެ ޚާރިޖީ ވަޒީރު، ޑރ. އެސް ޖައިޝަންކަރާއިއެކު ރައީސުލްޖުމްހޫރިއްޔާ ޑ. މުޙައްމަދު މުޢިއްޒުވެސް ބައިވެރިވެވަޑައިގެންނެވިއެވެ.

އިންޑިއާގެ އެގްޒިމް ބޭންކުގެ ލައިން އޮފް ކްރެޑިޓް ފެސިލިޓީގެ ދަށުން ރާއްޖޭގެ 28 ރަށެއްގައި ފެނާއި ނަރުދަމާގެ ނިޒާމްގެ މަސައްކަތް ނިންމައި އެމަޝްރޫޢުތައް ދިވެހި ސަރުކާރާއި ހަވާލުކުރުމުގެ ރަމްޒީލިޔުން ރާއްޖޭގެ ފޮރިން މިނިސްޓަރ މޫސާ ޒަމީރާއި ހަވާލުކޮށްދެއްވީ، އިންޑިއާގެ ޚާރިޖީ ވަޒީރު، ޑރ. އެސް ޖައިޝަންކަރެވެ.

މިއަދު ހަވާލުކުރި މަޝްރޫޢު ތަކުގެ ތެރޭގައި ހިމެނެނީ، 5 ރަށެއްގައި ފެނާއި ނަރުދަމާ ޤާއިމްކުރުމުގެ މަޝްރޫޢއާއި، 21 ރަށެއްގައި ފެނުގެ ނިޒާމް ޤާއިމްކުރުމަށް ހިންގި މަޝްރޫޢުތަކާއި، 2 ރަށެއްގެ ނަރުދަމާ ނިޒާމް ޤާއިމްކުރުމުގެ މަޝްރޫޢުތަކެވެ.  މިމަޝްރޫޢުތަކަކީ، އެމްޑީޕީގެ ވެރިކަމުގައި، ކުރީގެ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙްގެ ސަރުކާރުން، 18 މާރިޗު 2019ގައި އިންޑިއާގެ އެގްޒިމް ބޭންކާއިއެކު ސޮއިކުރި، 800 މިލިޔަން ޑޮލަރުގެ ކްރެޑިޓް ފެސިލިޓީ އެގްރިމެންޓްގެ ދަށުން ހިންގާފައިވާ މަޝްރޫޢުތަކެކެވެ. މިފެސިލިޓީގެ ދަށުން ޖުމުލަ 34 ރަށެއްގައި ފެނާއި ނަރުދަމާގެ ނިޒާމްތައް ޤާއިމްކުރުމުގެ މަޝްރޫޢުތައް ވަނީ ފަށާފައެވެ. ދިވެހި ސަރުކާރުން ހާމަކުރައްވާފައިވާ ގޮތުގައި މިމަޝްރޫޢުތަކަަށް، 110 މިލިއަން ޔޫއެސްޑޮލަރު ނުވަތަ 1.6 ބިިލިއަން ދިވެހި ރުފިޔާ ވަނީ ޚަރަދުކުރެވިފައެވެ. މި މަޝްރޫޢުތައް ކުރިޔަށް ގެންގޮސްފައި ވަނީ އިންޑިއާގެ 4 ކުންފުންޏާކާއި ހަވާލުކޮށްގެންނެވެ. 

މިމަޝްރޫއުތަކުގެ މަސައްކަތްތައް ކޮށްފައިވަނީ އިންޑިއާގެ ކުންފުނިތައް ކަމުގައިވާމ ވިޝްވަރާޖް އެންވަޔަރަންމެންޓް ޕްރައިވެޓް ލިމިޓެޑާއި، ޖޭއެމްސީ ޕްރޮޖެކްޓްސް ނުވަތަ ކަލްޕަޓްރޫ ޕްރޮޖެކްޓްސް އިންޓަރނޭޝަނަލް ލިމިޓެޑް، އެމްއެމްސީ އިންފްރާސްޓްރަކްޗަރސް ޕްރައިވެޓް ލިމިޓެޑް އަދި ޓްރީމެނީ އިންޖިނިއަރިން އެންޑް އިންޑަސްޓަޓްރީ ލިމިޓެޑާއި ހަވާލުކޮށްގެންނެވެ.

މިއަދު މިހަވާލު ކުރެވުނު 28 މަޝްރޫޢުގެ ފައިދާ 28 ހާހަށްވުރެ ގިނަ މީހުންނަށް ލިބޭ އިރު އެއީ، ރާއްޖޭގެ އާބާދީގެ %7 އިންސައްތަ ކަމުގައިވެސްވެސް ސަރުކާރުން ހާމަކުރައްވާފައިވެއެވެ.