ގަވާއިދާއި ހިލާފަށް އުޅެމުންދާ ބިދޭސީން މަދުކުރުމުގެ ގޮތުން މޯލްޑިވްސް އިމިގްރޭޝަނުން މިހާރު ހިންގަމުންދާ އޮޕަރޭޝަންތަކުގެ ތެރެއިން، ބުދަ ދުވަހު ހިންގި އިންސްޕެކްޝަންގައި ހުޅުމާލޭގެ ބޯކޮށާ ހަތަރު ތަނެއް ބަންދުކޮށްފިއެވެ.

ސޯޝަލް މީޑިއާގައި އިމިގްރޭޝަނުން ހިއްސާ ކުރިގޮތުގައި، ބުދަ ދުވަހުގެ އިންސްޕެކްޝަން ހާއްސަކުރީ ހުޅުމާލޭގައި ބޯކޮށާ ތަންތަން ހިންގާ ތަންތަނަށެވެ.

އެގޮތުން 6 ތަނެއް ބަލާފާސްކޮށްފައިވާ އިރު އޭގެ ތެރެއިން 4 ތަނެއް ވަނީ ބަންދުކޮށްފައެވެ. އަދި މި އިންސްޕެކްޝަންގައި 7 ބިދޭސީއަކު ވަނީ އިމިގްރޭޝަންގެ ބެލުމުގެ ދަށަށް ގެންގޮސްފައެވެ. ނަމަވެސް ބެލުމުގެ ދަށަށް ގެންދިޔަ ބިދޭސީންގެ އިތުރު އެއްވެސް މައުލޫމާތެއް އިމިގްރޭޝަނުން ހިއްސާކޮށްފައެއް ނުވެއެވެ.

އަންގާރަ ދުވަހު އިމިގްރޭޝަނުން ވަނީ ލުއިކާނާގެ ގޮތުގައި ހިމެނޭ ތަކެތި ސާފު ތާހިރުކަން ކުޑަ ތަނެއްގައި ޕެކެޓުކޮށް ވިއްކަމުން ދިޔަ ތަނެއް ރެއިޑުކޮށްފައެވެ. އަދި އެފަދަ ތަންތާ ތައްޔާރުކުރާ ތަކެތި ފިހާރަތަކުގައި ވިއްކަން ހުންނާތީ، އެފަދަ އެއްޗެއް ކައިގެން ހުށަހެޅިދާނެ ސިއްހީ ނުރައްކާތެރިކަމަކަށް ބަލައި، އިމިގްރޭޝަނުން ވަނީ އެ ތަކެތީގައި ހަރުކޮށްފައިވާ ލޭބަލް ވެސް އާންމުކޮށްފައެވެ.