ލުއިކާނާގެ ގޮތުގައި ހިމެނޭ ތަކެތި ސާފު ތާހިރުކަން ކުޑަ ތަނެއްގައި ޕެކެޓުކޮށް ވިއްކަމުން ދިޔަ ތަނެއް އަންގާރަ ދުވަހު އިމިގްރޭޝަނުން ރެއިޑުކުރުމާ ގުޅިގެން، އެތަނުގައި ޕެކެޓު ކުރަމުން ދިޔަ ތަކެތީގެ ތަފްސީލު ދިނުމަށް އާންމު ގިނަ ފަރާތްތަކެއް އެދެމުން ދިއުމުން، އެ މައުލޫމާތު އިމިގްރޭޝަނުން ހިއްސާކޮށްފިއެވެ.

އާންމުން އެކަމަށް އެދިފައިވަނީ އެފަދަ ތަކެތި ފިހާރައަކުން ގަނެގެން ބޭނުންކުރެވިދާނެތީ އާއި އެ ތަކެތި އުފެއްދުމުގައި ސާފުތާހިރުކަމަށް ނުބަލާތީ ފެތުރިދާނެ ބައްޔަކަށް ސަމާލުވުމުގެ ގޮތުންނެވެ. އެގޮތުން އިމިގްރޭޝަނުން ސޯޝަލް މީޑިއާގައި ކުރި ޕޯސްޓެއްގައި ބުނީ، ގިނަ ފަރާތްތަކަކުން އެތަނުގައި ތައްޔާރުކޮށް ވިއްކަމުންދިއަ ކާބޯތަކެތީގެ ތަފްސީލު ހޯދުމަށް އެދޭތީ، އެ މައުލޫމާތު ހިއްސާކުރީ ކަމަށެވެ.

ހަނާކުރި ފޯއް ޕެކެޓު، ފޮޓޯ: އިމިގްރޭޝަން

ތެލުލި ފަތް ޕެކެޓު، ފޮޓޯ: އިމިގްރޭޝަން

ހެލެނބެލި ހުތް ޕެކެޓު، ފޮޓޯ: އިމިގްރޭޝަން

"އަތުޖެހި" ޖަހާފައިވާ ކުދި ގުޅަ ޕެކެޓު، ފޮޓޯ: އިމިގްރޭޝަން

އިމިގްރޭޝަނުން އާންމު ކުރި ފޮޓޯތަކުން ފެންނަ ގޮތުގައި، އޭގެ ތެރެއިން ތެލުލި ފަތް ޕެކެޓުގެ ލޭބަލްގައި ޖަހާފައިވަނީ "އަލް ބަރަކަ ޕްރޮޑަކްޓް" އެއް ކަމަށެވެ. އަދި ހަނާކުރި ފޯއް ޕެކެޓުގެ ލޭބަލުގައި ޖަހާފައިވަނީ "އަލް ބަރަކަ ފުޑް ޕްރޮޑަކްޓް" މިހެންނެވެ. ހެލެނބެލި ހުތް ޕެކެޓާއި ކުދި ގުޅަ ޕެކެޓުގައި އެ މައުލޫމާތު ސާފެއް ނުވެއެވެ.

އިމިގްރޭޝަނުން ހާމަކޮށްފައިވާ ގޮތުގައި، އަންގާރަ ދުވަހުގެ އެ އޮޕަރޭޝަނަކީ "އިމިގްރޭޝަން ވޮޗް"އަށް ލިބުނު ރިޕޯޓާކާ ގުޅިގެން ކުރިޔަށް ގެންދިޔަ އޮޕަރޭޝަނެކެވެ. އަދި ރެއިޑު ކުރި ތަނަކީ ދިރިނޫޅެވޭވަރަށް ބާވެ ވީރާނާވެފައިވާ ގެއެއް ކަމަށް ވެސް އެ އިދާރާ އިން ވަނީ ހާމަކޮށްފައެވެ.

އެ އޮޕަރޭޝަނުގައި އިމިގްރޭޝަންގެ ޤަވައިދާ ޚިލާފަށް އެތަނުގައި ދިރިއުޅެމުންދިޔަ 3 ބިދޭސީއަކު ވަނީ އެ އިދާރާގެ ބެލުމުގެދަށަށް ގެންގޮސްފައެވެ.

އަންގާރަ ދުވަހުގެ އޮޕަރޭޝަނާ ގުޅިގެން އިމިގްރޭޝަނުން އިތުރަށް ހާމަކޮށްފައިވާ ގޮތުގައި، އެ ރެއިޑުގައި ފެނުނު ކާބޯތަކެތީގެ ބާވަތްތައް ގިނަ ފިހާރަ ތަކުގައި ވިއްކަން ހުންނާތީ އެކަން ހުއްޓުވުމުގެ މަގުސަދުގައި، އެ މައުލޫމާތު ވާނީ ކަމާގުޅުންހުރި އިދާރާތަކާ ހިއްސާކޮށްފައެވެ.