ބިދޭސީ މަސައްކަތްތެރިންނަށް ވަޒީފާ ދޭ ފަރާތުން ދައުލަތަށް ކޮންމެ މަހަކު ދައްކަންޖެހޭ ވާރކް ޕާމިޓް ފީ، ކޯޓާ ފީ އަދި ޖޫރިމަނާގެ އަދަދު 100،000ރ. (އެއް ލައްކަ ރުފިޔާ) އަށް ވުރެން އިތުރުވާ ފަރާތްތަކުގެ ނަންތައް މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އިން ބުދަ ދުވަހު ގެޒެޓުކުރި އިރު، އެ ލިސްޓުގެ ހަތަރު ވަނައިގައި، ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒުގެ ޕްރިންސިޕަލް އެޑްވައިޒަރ ޓު ދަ ޕްރެޒިޑެންޓް އޮން ޓްރޭޑް އެންޑް އިންވެސްޓްމަންޓްގެ މަގާމުގައި ހުންނެވި، މުޙައްމަދު ޢަލީ ޖަނާހުގެ ހޮޓެލްސް އެންޑް ރިޒޯޓް ކޮންސްޓްރަކްޝަން ޕްރައިވެޓް ލިމިޓެޑް ހިމެނިއްޖެއެވެ.

މިނިސްޓްރީ އިން އާންމުކުރި ލިސްޓުގައިވާ ގޮތުން، އެ ކުންފުނިން ވަނީ ވާރކް ޕާމިޓް ފީގެ ގޮތުގައި ދައްކަންޖެހޭ 11،161،150ރ. (އެގާރަ މިލިއަން އެއް ލައްކަ ފަސްދޮޅަސް އެއް ހާސް އެއް ސަތޭކަ ފަންސާސް ރުފިޔާ) އާއި ކޯޓާ ފީގެ ގޮތުގައި ދައްކަންޖެހޭ 1،406،000ރ. (އެއް މިލިއަން ހަތަރު ލައްކަ ހަ ހާސް ރުފިޔާ) އަދި ކެންސަލޭޝަން ފައިންގެ ގޮތުގައި ދައްކަންޖެހޭ 2،000ރ. (ދެހާސް ރުފިޔާ) ދައުލަތަށް ނުދައްކައެވެ. އެގޮތުން އެ ކުންފުނިން ވަނީ ބިދޭސީންނާ ގުޅުންހުރި ޖުމްލަ 12،569،150ރ. (ބާރަ މިލިއަން ފަސް ލައްކަ ފަސްދޮޅަސް ނުވަ ހާސް އެއް ސަތޭކަ ފަންސާސް ރުފިޔާ) ދައުލަތަށް ނުދައްކައެވެ.

ހޮޓެލްސް އެންޑް ރިޒޯޓް ކޮންސްޓްރަކްޝަން ޕްރައިވެޓް ލިމިޓެޑްގެ މިހާރުގެ މެނޭޖިންގް ޑިރެކްޓަރަކީ، މޯލްޑިވްސް މާކެޓިން އެންޑް ޕީއާރް ކޯޕަރޭޝަން (އެމްއެމްޕީއާރުސީ)ގެ ޗެއާޕާސަންގެ މަގާމުގައި ޑިސެމްބަރު 27، 2023 އިން މެއި 22، 2024 ގެ ނިޔަލަށް ހުންނެވި އައިޝާ ނޫރައިން ޖަނާހްއެވެ.

ކުރިން އެމްއެމްޕީއާރުސީގެ އެމްޑީގެ މަގާމުގައި ހުްނެނެވި އައިޝާ ނޫރައިން ޖަނާހް "އެމް.އެން.އޭ.ސީ.އައި ބިލްޑަރ އެވޯޑްސް 2023" ހަފުލާގައި، ފޮޓޯ: ރައީސް އޮފީސް

ހޮޓެލްސް އެންޑް ރިޒޯޓް ކޮންސްޓްރަކްޝަން ޕްރައިވެޓް ލިމިޓެޑްގެ ބޯޑު ޑިރެކްޓަކަށް އޭނާ އައްޔަންކޮށްފައިވަނީ ޖޫން 23، 2023 ގައެވެ. މި ކުންފުނީގެ ހިއްސާދާރުންގެ ގޮތުގައި މުޙައްމަދު ޢަލީ ޖަނާހުގެ އާއި އައިޝާ ނޫރައިން ޖަނާހްގެ އިތުރުން، އިތުރު ބޭފުޅަކު ނުހިމެނެއެވެ.

މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އިން ގެޒެޓުކުރި ލިސްޓުގައި ކުންފުނިތަކާއި އަމިއްލަ ފަރުދުން ހިމެނޭހެން 1026 ފަރާތެއްގެ ނަން ހިމެނެއެވެ. އަދި އެ ލިސްޓުގައި 10 މިލިއަނަށް ވުރެން ބޮޑު އަދަދަކުން ދައުލަތައް ފައިސާ ދައްކަންޖެހޭ 6 ކުންފުންޏެއް ހިމެނޭ އިރު، އެއް މިލިއަނަކަށް ވުރެން ގިނައިން ފައިސާ ދައްކަންޖެހޭ ޖުމްލަ 123 ފަރާތެއް ހިމެނެއެވެ. އެއީ ކުންފުނިތަކާ އަމިއްލަ ފަރުދުން ހިމެނޭ ހެންނެވެ.

މިނިސްޓްރީއިން ކުރި އިއުލާނުގައި، އެ ފައިސާ އޯގަސްޓް 12، 2024 ގެ ކުރިން ދައުލަތަށް ދެއްކުމަށް އަންގާފައިވެއެވެ. އަދި މި މުއްދަތުގެ ތެރޭގައި މި ފައިސާ ދައްކާ ޚަލާސްނުކޮށްފިނަމަ، އެފަރާތްތަކަށް އެކްސްޕެޓް ސިސްޓަމް މެދުވެރިކޮށް އައު ހުއްދަ ދިނުން ހުއްޓާލެވޭނެކަންވެސް އަންގާފައިވެއެވެ.