ބިދޭސީ މަސައްކަތްތެރިންނަށް ވަޒީފާ ދޭ ފަރާތުން ދައުލަތަށް ކޮންމެ މަހަކު ދައްކަންޖެހޭ ވާރކް ޕާމިޓް ފީ، ކޯޓާ ފީ އަދި ޖޫރިމަނާގެ އަދަދު 100،000ރ. (އެއް ލައްކަ ރުފިޔާ) އަށް ވުރެން އިތުރުވާ ފަރާތްތަކުގެ ނަންތައް ހާމަކުރާނެކަމަށް އަންގާރަ ދުވަހު އިއުލާން ކުރުމަށްފަހު، އެފަދަ ކުންފުނިތަކާއި ފަރުދުންގެ މައުލޫމާތުތައް މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އިން އިއުލާންކޮށްފިއެވެ.

އެ ވުޒާރާއިން ގެޒެޓުކުރި ލިސްޓުގައި ކުންފުނިތަކާއި އަމިއްލަ ފަރުދުން ހިމެނޭހެން 1026 ފަރާތެއްގެ ނަން ހިމެނެއެވެ. އެގޮތުން ދައުލަތަށް އެންމެ ބޮޑު އަދަދަކުން ވާރކް ޕާމިޓް ފީ، ކޯޓާ ފީ އަދި ޖޫރިމަނާގެ ފައިސާ ނުދައްކާ އޮތީ ފުޓްސަން އިންޓަނޭޝަނަލް ޕްރައިވެޓް ލިމިޓެޑް ނަމަކަށް ކިޔާ ކުންފުންޏެކެވެ. އެ ކުންފުނިން ދައުލަތަށް ދައްކަން ޖެހޭ ފައިސާގެ އަދަދު އުޅެނީ 26 މިލިއަނަށް ވުރެން މަތީގައެވެ.

މި ލިސްޓުގައި 10 މިލިއަނަށް ވުރެން ބޮޑު އަދަދަކުން ދައުލަތައް ފައިސާ ދައްކަންޖެހޭ 6 ކުންފުންޏެއް ހިމެނެއެވެ. އަދި މިލިއަނަކަށް ވުރެން ގިނައިން ފައިސާ ދައްކަންޖެހޭ ޖުމްލަ 123 ފަރާތެއް ހިމެނެއެވެ. އެއީ ކުންފުނިތަކާ އަމިއްލަ ފަރުދުން ހިމެނޭ ހެންނެވެ.

މިނިސްޓްރީއިން ކުރި އިއުލާނުގައި، އެ ފައިސާ އޯގަސްޓް 12، 2024 ގެ ކުރިން ދައުލަތަށް ދެއްކުމަށް އަންގާފައިވެއެވެ. އަދި މި މުއްދަތުގެ ތެރޭގައި މި ފައިސާ ދައްކާ ޚަލާސްނުކޮށްފިނަމަ، އެފަރާތްތަކަށް އެކްސްޕެޓް ސިސްޓަމް މެދުވެރިކޮށް އައު ހުއްދަ ދިނުން ހުއްޓާލެވޭނެކަންވެސް އަންގާފައިވެއެވެ.

ބިދޭސީންގެ މައްސަލަތައް ހައްލުކުރަން ގިނަ ފިޔަވަޅުތަކެއް އަޅަން މި ސަރުކާރުން ވަނީ ނިންމައިފަ އެވެ. އޭގެ ތެރޭގައި ގަވާއިދާ ޚިލާފަށް ރާއްޖޭގައި މަސައްކަތް ކުރުން ހުއްޓުވައި ވިޔަފާރި ހިންގާ ބިދޭސީން ޑިޕޯޓްކުރުން ހިމެނެއެވެ.

ބިދޭސީންނަށް މުސާރަ ނުދޭ ނަމަ ބައި ލައްކަ ރުފިޔާ އިން ޖޫރިމަނާ ކުރާ ގޮތަށް ގާނޫނަށް އިސްލާހެއް ވެސް ވަނީ ހުށަހަޅައިފައެވެ.