ޔޫރަޕްގެ ފެންވަރު ރަގަޅު ބޭސް ރާއްޖެ ގެނަސް، މިއަދުން ފެށިގެން ވިއްކަން ފަށައިފިއެވެ. ފުރަތަމަ ބުރުގައި ގެނަސްފައިވަނީ ހަތް ވައްތަރެއްގެ ބޭހެވެ.

މިކަމާއި ގުޅިގެން، ހެލްތު މިނިސްޓްރީ އާއި ފިނޭންސް މިނިސްޓްރީ އާއި އެންސްޕާ އާއި އާސަންދަ އާއި މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އަދި އެސްޓީއޯ ގުޅިގެން ނެރުނު ބަޔާނުގައި ބުނީ ދިވެހިންނަށް ފެންވަރު ރަނގަޅު ބޭސް ލިބޭނެ ގޮތް ކަށަވަރު ކޮށްދިނުމަކީ ރައީސް ޑރ. މުހައްމަދު މުއިއްޒުގެ ވަރަށް މުހިއްމު ރިޔާސީ ވައުދެއް ކަމަށެވެ. އަދި އެކަން ކަށަވަރުކުރުމުގެ ގޮތުން، ޕޫލް ޕްރޮކިއުމަންޓެއްގެ ތެރެއިން، އެއްފަހަރާ ގިނަ އަދަދެއްގެ ބޭސް ގެންނަން ޔޫއެންޑީޕީ އާއި އެސްޓީއޯއާ ހަވާލުކޮށް، އޭގެ ފުރަތަމަ ޝިޕްމަންޓް މިހާރު ރާއްޖެ ގެނެސްފައިވާ ކަމަށް އެ ބަޔާނުގައި ވެއެވެ.

ބަޔާނުގައި އިތުރަށް ފާހަގަކޮށްފައިވާ ގޮތުގައި، ޔޫރަޕް ބޭހަށް ބަދަލުވުމުގެ ކަންތައްތައް ކުރިޔަށް ދާނީ ދެ މަރުހަލާއަކަށް ބަހާލެވިގެންނެވެ. އެގޮތުން ފުރަތަމ މަރުހަލާގައި އޮންނާނީ، އައު ބޭސްތަކަށް ޑޮކްޓަރުން އަހުލުވެރި ކުރުވުމެވެ. އަދި މި މަރުހަލާ ސެޕްޓެމްބަރު މަހުގެ ނިޔަލަށް ކުރިޔަށް ގެންގޮސް، އޮކްޓޫބަރު މަހުގެ 1 ވަނަ ދުވަހު މި ބަދަލަށް އަމަލީ ސިފަ ގެނެވޭނެކަމަށް ފާހަގަ ކޮށްފައި ވެއެވެ.

މި މަސައްކަތުގެ ދެވަނަ މަރުހަލާގައި އޮންނާނީ އާސަންދައިން ކަނޑައަޅާފައިވާ އަސާސީ އަގަށް ބަދަލު ގެނައުމެވެ. އަދި އާސަންދައިގެ އަގުތަކަށް ބަދަލުގެނައުމަށްފަހު، ބޭހުގެ އަގު އާސަންދައިގެ އައު އަގަށް ވުރެން ބޮޑުވާނަމަ، އިތުރުވާބައި ދައްކަންޖެހޭނީ އެމީހެއްގެ ޖީބުންނެވެ.

ޔޫރަޕުން ގެނައި ފުރަތަމަ ޝިޕްމެންޓުގައި ހިމެނެނީ 7 ބޭހެކެވެ. އަދި އިތުރު 3 ބޭހެއް ވަރަށް އަވަހަށް ރާއްޖެ ގެންނާނެކަމަށް މައުލޫމާތު ދީފައިވެއެވެ. އަދި އޭގެ ފަހުން އިތުރު ބޭސްތައް ޕްރޮކިއު ކުރަން ފަށާނެއެވެ. އެއަށްފަހު، ރާއްޖެއަށް ބޭނުންވާ އަސާސީ ހުރިހާ ބޭހެއް މި ނިޒާމުގެ ތެރެއިން ގެނައުމަކީ ސަރުކާރުގެ އަމާޒެއް ކަމަށް ހާމަކޮށްފައިވެއެވެ.

ޔޫރަޕް ކޮލެޓީ ބޭސް ރާއްޖެ އެތެރެކޮށް ވިއްކަނީ، މިހާރު އަމިއްލަ ފަރާތްތަކުން އެ ބާވަތްތަކުގެ ބޭސް ވިއްކާ އަގަށް ވުރެ އެތައް ގުނައެއް ހެޔޮކޮށެވެ.