ހަ ދާއިރާއެއްގެ ކައުންސިލްތަކުގެ ބައި-އިލެކްޝަން މާލެ އާއި ރަށްރަށުގައި މިއަދު ކުރިޔަށް ދާއިރު، މާލެ ސިޓީ ކައުންސިލްގެ ތިން ގޮނޑި ވެސް ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އިން ކާމިޔާބުކޮށްފިއެވެ.

މާލޭ ސިޓީގައި ބައި-އިލެކްޝަންގައި ކުރިޔަށް ދަނީ، މާލޭ ސިޓީ ކައުންސިލުން ހުސްވެފައިވާ ހުޅުމާލޭ ދާއިރާގެ ގޮނޑި އާއި މައްޗަންގޯޅީ މެދު ދާއިރާ އާއި ހެންވޭރު ހުޅަނގު ދާއިރާގެ ގޮނޑިއެވެ.

ވަގުތީ ނަތީޖާ ދައްކާ ގޮތުން، ހެންވޭރު ހުޅަނގު ދާއިރާގެ ގޮނޑި ކާމިޔާބުކުރީ ފާތިމަތު ޝައުފާ ސަލީމްއެވެ. އަދި މައްޗަންގޮޅި މެދު ދާއިރާގެ ގޮނޑި ފާތިމަތު އިޝާން އަލީ ކާމިޔާބުކުރި އިރު، ހުޅުމާލެ ދާއިރާގެ ގޮނޑި ކާމިޔާބު ކުރީ އަލީ އައިމަންއެވެ.

މި ދާއިރާތަކަށް ޕީއެންސީގެ އިތުރުން، މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ވާދަކޮށްފައިވެއެވެ.

މާލޭ ސިޓީގެ ބައި-އިލެކްޝަންގެ އިތުރުން މިއަދު ދެން ކުރިޔަށް ދަނީ، ރ. ރަސްމާދޫ ކައުންސިލްގެ އަންހެން މެންބަރުގެ ގޮނޑީގެ ބައި އިލެކްޝަނާއި، ފ. ބިލެތްދޫ ކައުންސިލުގެ ރައީސް އިންތިހާބުކުރުމުގެ ބައި އިލެކްޝަނާއި އަދި ކުޅުދުއްފުށި ސިޓީ ކައުންސިލުގެ ކުޅުދުއްފުށި އުތުރު ދާއިރާގެ ގޮނޑީގެ ބައި އިލެކްޝަނެވެ.