ރާއްޖެއަށް ކުރިމަތިފައިވާ އެންމެ ބޮޑު އެއް މައްސަލަ ކަމުގައިވާ، ގަވާއިދާ ޚިލާފަށް އުޅޭ ބިދޭސީންގެ މައްސަލައަކީ ނިމިދިޔަ ސަރުކާރު ފަދައިން މި ސަރުކާރުން ވެސް ވެފައިވާ ބޮޑު ވައުދެކެވެ. އެ މައްސަލަ ހައްލު ކުރުމަށް މި ސަރުކާރުން ފަށާފައިވާ "ކުރަނގި" އޮޕަރޭޝަންގެ ދެވަނަ ފިޔަވަހި ވަނީ ހުކުރު ދުވަހުގެ ރޭ ދަރުބާރުގޭގައި އޮތް ހާއްސަ ރަސްމިއްޔާތެއްގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިފްތިތާހު ކޮށްދެއްވާފައެވެ.

އެ ރަސްމިއްޔާތުގައި ވާހަކަފުޅު ދައްކަވަމުން ހޯމް މިނިސްޓަރު އަލީ އިހުސާން ވިދާޅުވީ، މި ފޭސްގައި ކައުންސިލްތަކަށް ދޫކުރާ ފިންގަޕްރިންޓް މެޝިންތަކުގެ އެހީގައި، އެ ރަށެއްގައި ތިބޭ ހުރިހާ ބިދޭސީންގެ އިނގިލީގެ ނިޝާން ނަގާނެ ކަމަށެވެ. އަދި އެއަށްފަހު އެ ބިދޭސީންގެ މައުލޫމާތުތައް ހޯމް މިނިސްޓްރީގެ ސެންޓްރަލް ޑޭޓާ ސެންޓަރަށް ލިބޭނެ ކަމަށް މިނިސްޓަރު ވިދާޅުވިއެވެ.

މި ރަސްމިއްޔާތުގައި މިނިސްޓަރ އިތުރަށް ވިދާޅުވީ، ރަށްރަށުގައި އުޅޭ ބިދޭސީންގެ ދަފްތަރު އެކުވާލައި ބެލެހެއްޓުމަކީ ކައުންސިލްތަކަށް ގާނޫނީ ގޮތުން މަތިކޮށްފައިވާ ކަމަކަށް ވިޔަސް އެއީ މިހާތަނަށް އުނދަގޫ މަސައްކަތެކެވެ. ބައެއް ކައުންސިލްތަކުން މިހާރު ވެސް ބިދޭސީންގެ ދަފްތަރު ބަލަހައްޓާ ކަމަށާއި އެ ކަމަކު އެއީ 100 ނުވަތަ 200 ވަރަކަށް ބިދޭސީން ތިބޭ ރަށްރަށް ކަމަށް މިނިސްޓަރު ވިދާޅުވި އެވެ.

"ކުރަނގި" އޮޕަރޭޝަނަކީ ރާއްޖޭގައިދިރިއުޅޭ ހުރިހާ ބިދޭސީންގެ އައިޑެންޓިޓީ ދެނެގަތުމަށް ކުރިއަށް ގެންދާއޮޕަރޭޝަނެކެވެ. މި އޮޕަރޭޝަންގައި ރާއްޖޭގައި އުޅޭ ހުރިހާ ބިދޭސީންގެ ބަޔޮމެޓްރިކް އައިޑެންޓިފިކޭޝަންގެ ތެރެއިން ފިންގަޕްރިންޓާއި ފޭޝަލް ރިކޮގްނިޝަން ވެސް އަންނަނީ އެއްކުރަމުންނެވެ.

"ކުރަނގި" އޮޕަރޭޝަންގެ ފުރަތަމަ ފިޔަވަހި ފަށާފައިވާ މި އަހަރުގެ މެއި މަހުގެ 2 ވަނަ ދުވަހު ކ. ހިންމަފުށީގައެވެ.

ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ކުރިން ވިދާޅުވެފައި ވަނީ މުޅި ރާއްޖޭގައި ފަށާ މި މަސައްކަތް ނިންމަން އަމާޒު ކަނޑައަޅާފައި ވަނީ ތިން އަހަރު ދުވަހުންނެވެ. އެގޮތުން، އޮޕަރޭޝަނުގެ ފުރަތަމަ ބައިގެ މަސައްކަތް ނިންމަން އަމާޒު ހިފާފައި ވަނީ އެއް އަހަރު ދުވަހުން ކަމަށާއި، އެ މުއްދަތުގައި މަސައްކަތްކުރާނީ ގަވައިދާ ހިލާފަށް އުޅޭ ބިދޭސީން ނިޒާމުގެ ތެރެއަށް ވެއްދުމަށް ކަމަށް ވެސް މިނިސްޓަރ އިހުސާން ވިދާޅުވެފައިވެއެވެ.