ބުރާސްފަތި ދުވަހު ދުނިޔެ ދޫކުރެއްވި ރައީސް އިބްރާޙިމް މުޙައްމަދު ޞާލިޙްގެ މަންމާފުޅަކީ ޤައުމީ ޚިދުމަތްތެރިއެއް ކަމަށް، ކުރީގެ ފަސްޓް ލޭޑީ ފަޒްނާ އަޙުމަދު ވިދާޅުވެއްޖެއެވެ. އެކަމަނާގެ މައިދައިތާފުޅުގެ ދިރިއުޅުއްވުމަށް އިޝާރާތް ކުރައްވައި މެޑަމް ފަޒުނާ ވަނީ އެކަމަށް ހެކިދޭ ގިނަ ސަބަބުތަކެއް ފޭސްބުކްގައި ކުރެއްވެވި ޕޯސްޓެއްގައި ހިއްސާ ކުރައްވާފައެވެ.

މެޑަމް ފަޒުނާ ވިދާޅުވީ، ޞާލިހު އަދި އަޙުލާޤު ރަގަޅު ދަރިންތަކެއް ބަލާ ބޮޑު ކުރުމަށް ވުރެން ވަކި ބޮޑު ގައުމީ ޚިދުމަތެއް ނޯންނާނެ ކަމަށެވެ. އެގޮތުން އެކަމަނާގެ މައިދައިތާފުޅުގެ ދިރިއުޅުމުގެ ގުރުބާނީ ސިފަ ކުރައްވަމުން ވިދާޅުވެފައިވަނީ، ޅަ އުމުރުގައި 13 ދަރިކަލުން ލިބިވަޑައިގެންފައި ވަނިކޮށް ހުވަފަތްވެލެއްވުމުން، ދަރިން ބަލާ ބޮޑު ކުރެއްވީ ބައްޕަ އަކާ ނުލައި ކަމަށެވެ.

މެޑަމް ފަޒުނާގެ މައިދައިތާފުޅުގެ ދަރިކަލުންގެ ތެރޭގައި ރައީސް ޞާލިޙްގެ އިތުރުން، ހުޅުމާލެ ދާއިރާގެ ކުރީގެ މެމްބަރު ޢަލީ ނިޔާޒާއި މަޖީދިއްޔާ ސްކޫލުގެ ޕްރިންސިޕަލް އައިޝަތު މުޙައްމަދު ޞާލިހާއި ރައީސް އޮފީހުގައި ރައީސުލްޖުމްހޫރިއްޔާގެ ޕާސަނަލް ސެކްރެޓަރީކަން ގިނަ އަހަރުތަކެއް ވަންދެން ކުރެއްވި ފާތިމަތު މުޙައްމަދު ޞާލިހު (ފާތޭ) ހިމެނިވަޑައިގަންނަވައެވެ.

މީގެ އިތުރުން، ޤުރުއާން ހިތުދަސް 3 ހާފިޒުން ވެސް ތިއްބަވައެވެ. މި ހުރިހާ ބޭފުޅުންނަކީ ވެސް ލޯފަން ބޭފުޅުންނެވެ.

އަދި އެ އާއިލާގެ އެއް ބޭފުޅަކު 2021 ވަނަ އަހަރު ނިޔާވުމާ ގުޅިގެން މިހާރު ދުނިޔޭގަ ތިއްބެވީ 12 ބޭކަލުންނެވެ.

ރައީސް ޞާލިޙްގެ މަންމާފުޅު އިތުރަށް ސިފަ ކުރައްވަމުން މެޑަމް ފަޒުނާގެ ފޭސްބުކް ޕޯސްޓުގައި ވިދާޅުވެފައި ވަނީ، އެކަމަނާއަކީ ނޫރާނީ ގޭދޮށަށް އަންނަ އެންމެންގެ އެކުވެރިއެއް ކަމަށާއި، އެގޭދޮށަށް އަންނަ ހުރިހާ އުމުރެއްގެ މީހުނާ، ކޮންމެ މައުޟޫއަކަށް ވެސް ވާހަކަދައްކަވާނެ ކަމަށެވެ. އަދި ރަށަށް ޒިޔާރާތްކުރާ ގިނަ ބަޔަކަށް މެހެމާންދާރީ އަދާކުރެއްވުން ވެސް އެއީ އެކަމަނާގެ ޙާއްސަ ސިފަފުޅެއް ކަމަށް ފާހަގަ ކުރައްވާފައިވެއެވެ.

މެޑަމް ފަޒުނާ އިތުރަށް ފާހަގަ ކުރެއްވީ، އެކަމަނާގެ ކެތްތެރިކަމާ ޝަކުވާ ނުކުރުމުގެ ވާހަކައެވެ. އަދި އެ ސިފަފުޅުތަކަކީ ފިލާވަޅެއްގެ ގޮތުގައި ދެކިވަޑައިގަންނަވާ ކަމަށް ވިދާޅުވެފައިވެއެވެ.

އުމުރުފުޅުން 80 އަހަރުގެ މުއުމިނާ އަވަހާރަވީ އޭޑީކޭ ހޮސްޕިޓަލުގައި ފަރުވާ ހޯއްދަވަމުން ގެންދަވަނިކޮށެވެ. އެކަމަނާ އާލާސްކަންފުޅާ އުޅުއްވާތާ ގިނަ ދުވަސްތަކެއް ވެއްޖެއެވެ.