އައްޑޫގައި ހުންނަ ޕޮލިސް ކޮލެޖުގެ ގިނަ ދަރިވަރުންތަކެއް ކާނާ ވިހަވެ  5 ދަރިވަރަކު އައިސީޔޫގައި އެޑްމިޓްކޮށް ފަރުވާދީފައި ވީ ނަމަވެސް، މީގެ ތެރެއިން ދެ ކުދިން ފިޔަވައި އެހެން ހުރިހާ ކުދިންނެއް މިހާރު ހޮސްޕިޓަލުން ޑިސްޗާޖުކޮށްފައިވާ ކަމަށް ފުލުހުން ހާމަކޮށްފިއެވެ. އަދި މި ވަގުތު އައިސީޔޫގައި ތިބި ދެ ކުދިންގެ ހާލު ރަގަޅު ވަމުން އަންނަ ކަމަށް ވެސް ފުލުހުންވަނީ ހާމަކޮށްފައެވެ.

ކާނާ ވިހަވެގެން އައްޑޫ އިކުއަޓޯރިއަލް ހޮސްޕިޓަލްގައި ރޭ އެޑްމިޓް ކުރީ، ހިތަދޫގައި ހިންގާ ޕޮލިސް ކޮލެޖުގެ ތަމްރީނަށް ދިޔަ ފުލުހުންގެ ތެރެއިން 32 މީހެކެވެ. އޭގެ ތެރެއިން ޖުމްލަ ފަސް މީހަކަށް އައިސީޔޫގައި ރޭ ފަރުވާ ދޭން ޖެހުނެވެ.

މައުލޫމާތު ލިބިފައިވާ ގޮތުގައި ޕޮލިސް ކޮލެޖުގައި ކޭޓަރިންގެ ހިދުމަތް ދެނީ ބެސްޓް ސިލެކްޝަން ކިޔާ ކުންފުންޏަކުންނެވެ. އެ ކުންފުނީގެ ދަށުން މާލެ އާއި އައްޑޫގައި ވެސް ރެސްޓޯރަންޓުތައް ހިންގައެވެ. އަދި މި ކުންފުނިން އަންނަނީ ކޭޓަރިންގެ ހިދުމަތް ވެސް ދެމުންނެވެ.

މި ހާދިސާގައި ފުލުހުންނަށް އެހީތެރިވި ފަރާތްތަކަށް ވެސް އެ އިދާރާއިން ވަނީ މިއަދު ޝުކުރު ދަންނަވާފައެވެ.