ގަވާއިދާ ހިލާފަށް އުޅޭ ބިދޭސީންގެ މައުލޫމާތާއި އަދި އިމިގްރޭޝަނާ ގުޅުންހުރި ކަންތައްތަކާއި މައުލޫމާތު ރިޕޯޓު ކުރުމަށް، މޯލްޑިވްސް އިމިގްރޭޝަނުން "އިމިގްރޭޝަން ވޮޗް" ގެ ނަމުގައި ޕޯޓަލްއެއް އިފްތިތާހު ކޮށްފިއެވެ. މި ޕޯޓަލް އިފްތިތާހު ކޮށްފައި ވަނީ މިއަދު އެ އިދާރާއިން ބޭއްވި ނޫސްވެރިންގެ ބައްދަލުވުމުގެ ތެރެއިންނެވެ.

މި  ޕޯޓަލް މެދުވެރިކޮށް އިމިގްރޭޝަނާ މައުލޫމާތު ހިއްސާ ކުރެވޭނީ އެ އިދާރާގެ ޑިޖިޓަލް ސާވިސްތަކަށް ހާއްސަކޮށްފައިވާ އިމުގާ މެދުވެރިކޮށެވެ.

މި ޕޯޓަލް އިފްތިތާހު ކުރުމަށްފަހު ކޮންޓްރޯލާ ޖެނެރަލް މުޙައްމަދު ޝައްމާން ވަޙީދު ވިދާޅުވީ، މިއީ ރައްޔިތުންނާ ގުޅިގެން އިމިގްރޭޝަނާ ގުޅުންހުރި މައްސަލަތައް ހައްލު ކުރެއްވުމުގެ މަގުސަދުގައި އިފްތިތާހު ކުރެވުނު ޕޯޓަލް އެއް ކަމަށެވެ. އަދި މި ޕޯޓަލް މެދުވެރިކޮށް ކާކުކަން ނޭންގޭނޭހެން މައްސަލަތައް ރިޕޯޓު ކުރެވޭނެ ކަމަށާއި، އެއީ ދުނިޔޭގެ "ބެސްޓް ޕްރެކްޓިސް" ކަމުގައި ވެސް ފާހަގަކޮށްފައިވެއެވެ.

މި ޕޯޓަލްއަށް ވަންނައިރު، އެންމެ ފުރަތަމަ ވެސް ބުނެފައިވަނީ، އެ ޕޯޓަލް މެދުވެރިކޮށް ހުށަހަޅާ މައުލޫމާތު އިމިގްރޭޝަނުން ވަރަށް ސީރިއަސްކޮށް ނަގާނެ ކަމަށާއި، އެނގިހުރެ ދައުލަތުގެ އިދާރާއަކަށް ދޮގު މައުލޫމާތު ހިއްސާ ކުރުމަކީ ގާނޫނާ ހިލާފުކަމެއް ކަމަށެވެ. އަދި އެއަށްފަހު، އެމީހަކު ހުށަހަޅާ މައްސަލައިގެ ބާވަތް އިހްތިޔާރު ކުރުމަށްފަހު، އެ މައްސަލައެއް މި ޕޯޓަލް މެދުވެރިކޮށް ހިއްސާ ކުރެވެއެވެ.