ފުލުހުންގެ ބައްދަށް ގެންދަން އުޅެނިކޮށް ފިލަން އުޅުމުގެ ތެރޭގައި އަނިޔާވި މީހާގެ ހާލު ސީރިއަސްވެ، ވެންޓިލޭޓަރުގައި ފަރުވާ ދޭން ފަށައިފިއެވެ. 

އެމީހާއަކީ ޑްރަގް ކޯޓުގެ އަމުރަކާ ގުޅިގެން މިދިޔަ ހޯމަ ދުވަހުގެ 1 ޖަހާއިރަށް ހާޒިރުކުރަން އުޅުނު 38 އަހަރުގެ ފިރިހެނެކެވެ. 

އާއިލާ އިން ހިއްސާ ކުރި ކަމަށް “މިހާރު” ނޫހަުން ބުނެފައިވަނީ، އަނިޔާވި ވަގުތުން ފެށިގެން ހޮސްޕިޓަލާ ހިސާބަށް އެމީހާ ގެންދިއުމަށް 1 ގަޑި އިރާ 50 މިނެޓު ހޭދަވެފައިވެއެވެ. އެގޮތުން އެމީހާ އެގޭގެ ފުރަތަމަ ފަންގިފިލާއިން މެންދުރުފަހު 2:30 ހާއިރު ވެއްޓިފައިވާ އިރު، އޭނާ ހޮސްޕިޓަލަށް ގެންގޮސްފައިވަނީ އެ ދުވަހުގެ ހަވީރު 4:20 ގައެވެ. 

އާއިލާއިން ހާމަކޮށްފައިވާ ގޮތުން، އޭނާޔަށް އަނިޔާވުމުން ހޮސްޕިޓަލަށް ގެންދިއުމުގެ ބަދަލުގައި ފުރަތަމަ ގެންގޮސްފައިވަނީ ފުލުހުންގެ ހައްޔަރަށެވެ. 

ހޮސްޕިޓަލަށް ގެންދިއުމުން، ސިކުނޑިއަށް ލޭ އެޅިފައިވާތީ ހަމަ އެ ދުވަހު އޭނާގެ ބޮލުގެ އޮޕަރޭޝަނެއް ވަނީ ކޮށްފައެވެ. އަދި ދެން އަނިޔާވެފައި ވަނީ އޭނާގެ މައިބަދައަށެވެ. މައިބަދަ އަށް ލިބިފައިވާ އަނިޔާ އަށް ފަރުވާ ދެވޭނީ ހާލަތު ސްޓޭބަލް ވުމުން ކަމަށް ޑޮކްޓަރުން ބުނެފައިވާ ކަމަށް އާއިލާއިން ބުނެފައި ވެއެވެ.

މި ހާދިސާ ހިނގާދިޔަ ގޮތުން އާއިލާގެ ކަންބޮޑުވުންތަކެއް ހުރިކަމަށް ފުލުހުންނާ ހިއްސާކޮށްފައިވާތީ، އެ މައްސަލަ ބަލަމުން އަންނަ ކަމަށް ފުލުހުންގެ ފަރާތުން މައުލޫމާތު ދިން އޮފިޝަލް ވަނީ ހޯމަދުވަހު ވިދާޅުވެފައެވެ.