ފުލުހުންގެ ބައްދަށް ގެންދަން އުޅުނު މީހަކު ފިލަން އުޅުމުގެ ތެރޭގައި އަނިޔާވެ، އޭނާގެ ހާލު ސީރިއަސް ވެއްޖެއެވެ. މާލޭގައި ހިނގި މި ހާދިސާގައި އޭނާ ވެއްޓިފައިވަނީ ގެއެއްގެ ފުރާޅު މަތިންނެވެ.

ފުލުހުން ހާމަކޮށްފައިވާ ގޮތުގައި އެއީ ޑްރަގް ކޯޓުގެ އަމުރަކާ ގުޅިގެން މިއަދުގެ 1 ޖަހާއިރަށް ހާޒިރުކުރަން އުޅުނު 38 އަހަރުގެ ފިރިހެނެކެވެ. އަދި އޭނާއަށް ލިބުނު އަނިޔާތަކަށް މިހާރު އައިޖީއެމްއެޗުން ފަރުވާ ހޯދަމުން އަންނަކަމަށް ވެސް ފުލުހުންވަނީ ބުނެފައެވެ.

އެނގިފައިވާ ގޮތުގައި އޭނާގެ ބޮލަށާއި މައިބަދައަށް ވަނީ ސީރިއަސް އަނިޔާތަކެއް ވެފައެވެ.

މި ހާދިސާ ހިނގާދިޔަ ގޮތުން އާއިލާގެ ކަންބޮޑުވުންތަކެއް ހުރިކަމަށް ފުލުހުންނާ ހިއްސާކޮށްފައިވާތީ، އެ އެކަން ބެލުމަށް ޕްރޮފެޝަނަލް ސްޓެންޑާޑްސް ކޮމާންޑާއި، ނޭޝަނަލް އިންޓެގްރިޓީ ކޮމިޝަން އަދި އެޗްއާރުސީއެމްގައި ވެސް އެދިފައިވާނެ ކަމަށް، ފުލުހުންގެ ފަރާތުން މައުލޫމާތު ދިން އޮފިޝަލް ވަނީ ވިދާޅުވެފައެވެ.

މި މައްސަލައިގައި އާއިލާއިން ކަންބޮޑުވުން ފާޅުކުރީ، އެ މީހާއަށް އަނިޔާވުމުން ހޮސްޕިޓަލަށް ގެންދިއުމުގެ ބަދަލުގައި ކަސްޓޯޑިއަލް އަށް ގެންދިއުމުންނެވެ. ނަމަވެސް އޭނާ ވަނީ އޭގެ ފަހުން ހޮސްޕިޓަލަށް ގެންގޮސްފައެވެ. އަދި މިހާރު އޭނާގެ އޮޕަރޭޝަނެއް ކޮށްފައިވާކަމަށް ވެސް މައުލޫމާތު ލިބެއެވެ. އޮޕަރޭޝަން ކުރީ ސީދާ ކޮން އަނިޔާއަކާ ގުޅިގެން ކަމެއް އަދި ސާފެއް ނުވެއެވެ.