ޔޫރަޕިއަން ޗެމްޕިއަންޝިޕް 4 ވަނަ ފަހަރަށް ކާމިޔާބުކޮށް، ސްޕެއިނަކީ މި މުބާރާތް އެންމެ ގިނަ ފަހަރު ކާމިޔާބުކުރި ޓީމެވެ. އަދި މީގެ ތެރެއިން 3 ތަށި ކާމިޔާބުކޮށްފައި މިވަނީ ފާއިތުވި 16 އަހަރުގެ ތެރޭގައެވެ. އެއީ އެންމެ ފަހުން ކުޅުނު ޔޫރޯގެ 5 މުބާރާތުން 3 ތައްޓެވެ. 

ސްޕެއިން ފިޔަވާ އިތުރު ޓީމަކަށް މުބާރާތުގެ 2 ތަށި ޖެހިޖެހިގެން ކާމިޔާބު ކުރެވިފައި ނުވުމުގެ އިތުރުން، މިހާކުރު މުއްދަތެއްގައި މި މުބާރާތް މި އަދަދަކަށް އެހެން ގައުމަކަށް ކާމިޔާބު ކުރެވިފައެއް ވެސް ނުވެއެވެ. އެއީ މި މުބާރާތުގެ ތާރީހުގައި ސްޕެއިން ހާއްސަވާ އަނެއް ސަބަބެވެ.

އާދީއްތަ ދުވަހުގެރޭ ކުޅުނު ޔޫރޯ 2024 ގެ ފައިނަލުގައި ސްޕެއިނުން އިންގްލެންޑު ބަލިކޮށްވައި ވަނީ 2-1 އިންނެވެ. 

މި މެޗުގެ ދެވަނަ ހާފު ފަށާ މާގިނަ އިރުތަކެއް ނުވެ، މި މުބާރާތުގައި ސްޕެއިންގެ އެޓޭކުގައި މުހިންމު ދައުރެއް އަދާކުރަމުން އަންނަ ނިކޯ ވިލިއަމްސް ވަނީ ސްޕެއިނަށް ލީޑު ނަގާދީފައެވެ. އިންގްލެންޑުން މެޗުގެ ނަތީޖާ ހަމަހަމަކުރީ މެޗުގެ 73 ވަނަ މިނެޓުގައެވެ. އެއީ ބަދަލު ކުޅުންތެރިއެއްގެ ގޮތުގައި ނިކުތް ކޯލް ޕާމާރ ކާމިޔާބުކުރި ގޯލަކުންންނެވެ. 

ސްޕެއިނުން މުބާރާތް ކާމިޔާބުކުރީ، މޮރާޓާގެ ބަދަލުގައި ކުޅެން ނިކުތް މިކޭލް އޮޔަޒަބޭލް، މެޗު ނިމެން 4 މިނެޓަށްވެފައި ވަނިކޮށް ކާމިޔާބު ކުރި ގޯލުންނެވެ. 

އަނެއްކޮޅުން މިއީ ޔޫރޯގެ ފައިނަލުގައި އިންގްލެންޑުން ވިދިވިދިގެން ބަލިވި ދެވަނަ ފަހަރެވެ. މީގެ ކުރިން 2021 ގައި ބޭއްވި 2020 ގެ ޔޫރޯގެ ފައިނަލުގައި އިންގްލެންޑް އަމިއްލަ ދަނޑުގައި ބަލިވެފައިވަނީ އިޓަލީ އަތުންނެވެ.