އެމެރިކާގެ ކުރީގެ ރައީސް އަދި މި އަހަރުގެ ނޮވެމްބަރުގައި ބާއްވާ އެމެރިކާގެ ރިޔާސީ އިންތިހާބުގައި ރިޕަބްލިކަން ޕާޓީގެ ފަރާތުން ވާދަކުރާ ޑޮނާލްޑް ޓްރަމްޕް އަވަހާރަކޮށްލުމަށް މިއަދު ދިން ބަޑީގެ ހަމަލާ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުށްވެރިކުރައްވައިފިއެވެ.

މި ހަމަލާ ކުށްވެރިކުރައްވައި "އެކްސް" ގައި ކުރެއްވެވި ޕޯސްޓެއްގައި ރައީސުލްޖުމްހޫރިއްޔާ ވިދާޅުވީ، އަނިޔާވެރިކަމަކީ ސިޔާސީ ކަންކަމުގައާއި އެހެނިހެން ކަންކަމުގައި ވެސް ބަލައިގަނެވޭނެ ކަމެއް ނޫން ކަމަށެވެ. މި މެސެޖާއެކު، ރައީސް ވަނީ ޓްރަމްޕްގެ އާއިލާއަށް އަދި ހަމާލާގައި ޒަޚަމްވި މީހުންނަށް ހެޔޮ އެދުންތައް ފޮނުއްވަވާފައެވެ.

ޓްރަމްޕަށް ހަމަލާދީފައި ވަނީ އެމެރިކާގެ ޕެންސިލްވޭނިޔާގައި ކުރިޔަށް ގެންދިޔަ ކެމްޕެއިން ހަރަކާތެއްގެ ތެރެއިން ޕޯޑިއަމްގައި ވާހަކަ ދައްކަން ހުއްޓައެވެ.

މި ހާދިސާ ހިނގި މަންޒަރު ފެންނަ ވީޑިއޯތަކުން ފެންނަ ގޮތުގައި، ބަޑީގެ އަޑާއެކު ޓްރަމްޕް ވަނީ އޭނާގެ ކަނާތު ކަންފަތުގައި އަތްއަޅާ، ޕޯޑިއަމްގެ ނިވަލަށް ތިރިވެފައެވެ. އަދި ހަމަ އެ ވަގުތު އެމެރިކާގެ ސީކްރެޓް ސާރވިސް އެޖެންޓުން ވަނީ ސްޓޭޖަށް އަރާ، ޓްރަމްޕް ހިމާޔަތްކޮށް، އޭނާ ވަށާލައިގެން ވެހިކަލަށް ގެންގޮސްފައެވެ.