ހަތް މަސް ދުވަހުގެ މުއްދަތަށް ދެމިގެން ދިޔަ އުފާ ފާޅުކުރުންތަކަށްފަހު، އިންޑިއާގެ އެންމެ މުއްސަނދި މީހާގެ ފިރިހެން އަދި އެންމެ ހަގު ދަރި، އަނަންތު އަމްބާނީ އާއި، ފުޅާ ދާއިރާއެއްގައި އިންޑިއާގައި ބޭސްވެރިކަމުގެ ބާވަތްތަކުގެ ވިޔަފާރިކުރާ އާއިލާއަކުން އައި ރަދިކާ މާޗަންޓު، ހުކުރު ދުވަހު ކައިވެނިކޮށްފިއެވެ.

މި ކުލަގަދަ ކައިވެނީގެ ހަފްލާގައި ދުނިޔޭގެ މަޝްހޫރު އެތަކެއް ސިޔާސީ މީހުނާއި ތަރިންނެއް ވަނީ ބައިވެރިވެފައެވެ. އޭގެ ތެރޭގައި ކިމް އަދި ކްލޮއެ ކާޑޭޝަން އާއި ނިކް ޖޯނަސް އަދި ޕްރިޔަންކާ ޗޯޕްރާ އާއި އިނގިރޭސިވިލާތުގެ ކުރީގެ ބޮޑު ވަޒީރު ޓޯނީ ބްލެއަރ އަދި ބޮރިސް ޖޯންސަންވެސް ހިމެނެއެވެ. މީގެ އިތުރުން އިންޑިއާގެ އެތަކެއް ފަންނާނުންނަކާއި، ސިޔާސީ ގިނަ ފަރާތްތަކެއް ވެސް ބައިވެރިވިއެވެ.

މުކޭޝް އަމްބާނީ އަކީ ދުނިޔޭގެ 10 ވަނައަށް އެންމެ މުއްސަނދި މީހާއެވެ. ފޯބްސް އިން ހާމަކުރާ ގޮތުގައި މުކޭޝްގެ ހަޒާނާގައި 122 ބިލިއަން ޑޮލަރު އެބަ ހުއްޓެވެ. އަނަންތު އަމްބާނީގެ ކާފަ ފެށި ވިޔަފާރި އެންމެ ފަހުން އިންޑިއާގެ އެންމެ ބޮޑު އަމިއްލަ ވިޔަފާރިއަށް ބަދަލުވެގެން ގޮސްފައިވާއިރު، މިހާރު މި ވިޔަފާރީގެ ވެރިޔަކީ މުކޭޝްއެވެ.

ކައިވެނީގެ ހަފްލާ ކުރިޔަށް ދަނީ މުމްބާއީގައި ހުންނަ އަމްބާނީގެ ޖިއޯ ވާރލްޑް ކޮންވެންޝަން ސެންޓަރުގައެވެ. މިއީ އެއްފަހަރާ 16،000 މީހުނަށް ބޭނުންކުރެވޭ އިމާރާތެކެވެ. އަދި މި ހަފްލާއާ ގުޅިގެން މި ހިސާބުގެ ގިނަ މަގުތަކެއް ފުލުހުން ވަނީ ބަންދުކޮށްފައެވެ.