“ބްރެއިން އީޓިން އެމީބާ އިންފެކްޝަން" ނަމަކަށް ކިޔާ ސިކުނޑިއަށް ޖެހޭ ނުރައްކާތެރި ބައްޔެއް އިންޑިއާގެ ކެރެލާގައި ފެތުރެމުންދާތީ، ކެރަލާއަށް ދަތުރު ކުރާ ދިވެހީންނާއި އެތާންގައި ދިރިއުޅޭ ދިވެހީން އެ ކަމަށް ސަމާލުވުމަށް ދިވެހިރާއްޖޭގެ ކޮންސިއުލޭޓް ޖެނަރަލުން ނެރުނު އިއުލާނެއްގައި ބުނެފިއެވެ.

ކޮންސިއުލޭޓުން މިކަން އަންގާފައި މިވަނީ ކެރެލާގެ ސިއްހަތާ ބެހޭ ވުޒާރާތަކުން ވެސް މި ބައްޔަށް ސަމާލުވުމަށް އިލްތިމާސް ކުރުމާ ގުޅިގެންނެވެ. 

ކޮންސިއުލޭޓުން ނެރުނު އިއުލާނުގައި އިތުރަށް ބުނެފައިވަނީ، މި ބަލީގެ އަލާމާތެއް ފެނިއްޖެ ނަމަ ލަސްނުކޮށް ޑޮކްޓަރަށް ދެއްކުމަށެވެ. މި ބަލީގެ އަމާލާތްތަކުގެ ތެރޭގައި ހިމެނެނީ ހުން އައުމާއި، ބޮލުގައި ރިއްސުމާއި، ހޮޑުލުމާއި، ކަނދުރާގެ ނާރު އެރުމާއި، ވާނުވާ ނޭނގުން އަދި ފިޓު ޖެހުން ފަދަ ކަންކަމެވެ. 

މި ބަލި ޖެހިގެން ފާއިތުވި ދެ މަސްދުވަސް ތެރޭގައި 4 ކޭސް ރިޕޯޓުކޮށްފައި ވާއިރު، މީގެ ތެރެއިން 3 ކުޑަކުދިން ވަނީ މަރުވެފައެވެ. 

މި ބަލި ދަތުރު ކުރަނީ، ހޫނުކޮށް ހުންނަ ސާފު ފެނުގެ ތެރެއިންކަމުން، ޑޮކްޓަރުން އިލްތިމާސް ކުރަނީ އިންޑިއާގެ ކޯރުތަކަށް ނޭރުމަށެވެ. އަދި ކޯރަކަށް އެރެފިނަމަ، ތާފަނާ ފެނުން ނޭފަތް ދޮވުމަށް ވެސް އިލްތިމާސްކޮށްފައިވެއެވެ. ސަބަބަކީ މި ބަލި ހަށިގަނޑުގެ ތެރެއަށް ވަންނަނީ އަނގަޔާއި ނޭފަތުން ކަމަށް ވުމެވެ. 

ކެރަލާގެ މެޑިޓްރިނާ ހޮސްޕިޓަލްގެ ޑޮކްޓަރަކު ފާހަގަކޮށްފައިވާ ގޮތުގައި، މި ބަލީގައި މަރުވަނީ ބަލިޖެހުމަށްފަހު ރަގަޅު ފަރުވާ ނެދެވުމުގެ ސަބަބުންނެވެ. އެހެންކަމުން މި ބައްޔާ ގުޅިގެން އާންމުން ހޭލުންތެރި ކުރުމަކީ މުހިންމު ކަމެއްކަމުގައި ޑޮކްޓަރ ފާހަގަކޮށްފައި ވެއެވެ.