ދިވެހި ކޮންމެ ރައްޔިތަކަށް އާސަންދަ ސްކީމްގެ ދަށުން މެޑިކަލް ޗެކްއަޕް ހެދޭނެ އިންތިޒާމު ހަމަޖެއްސުމަށްޓަކައި ސަރުކާރުން ތަންފީޒު ކުރަން ފަށާފައިވާ ސިޔާސަތުގެ ދަށުން، ހުރިހާ އުމުރެއްގެ މީހުނަށް އާސަންދަ ސްކީމްގެ ދަށުން މެޑިކަލް ޗެކަޕް ހެދޭނެ ފުރުސަތު ހުޅުވާލައިފިއެވެ.

މިދިޔަ ޖޫން މަހުގެ ނިޔަލަށް މި ސިޔާސަތުގެ ދަށުން މެޑިކަލް ޗެކަޕް ހެދުމަށް ހުޅުވާލާފައި އޮތީ އުމުރުން 40 އަހަރުން މަތީގެ މީހުނަށާއި 18 އަހަރުން ދަށުގެ ކުދިންނަށެވެ. ނަމަވެސް 1 ޖުލައި 2024 އިން ފެށިގެން އުމުރުން 19 އަހަރާއި 39 އަހަރާއި ދެމެދުގެ މީހުންނަށް ސަރުކާރުގެ ހޮސްޕިޓަލްތަކުން މެޑިކަލް ޗެކްއަޕް ހެދޭނެ އިންތިޒާމު ހަމަޖައްސާފައިވާކަމަށް، އެންސްޕާއިން ވަނީ އިއްޔެ ބުނެފައެވެ. އެހެންކަމުން، މިހާރު ހުރިހާ ދިވެހިންނަށް ހިލޭ މެޑިކަލް ޗެކަޕް ހެދޭނެ މަގު މިވަނީ ފަހިވެގެން ގޮސްފައެވެ.

މިކަމާ ގުޅިގެން އާސަންދައިން އިއްޔެ ބުނެފައިވަނީ، ސަރުކާރުގެ ހަފްތާ 14 މަގު ޗާޓުގައި ހިމެނިފައިވާ ގޮތަށް، އުމުރުން 19 އަހަރާއި 39 އަހަރާއި ދެމެދުގެ މީހުންނަށް ސަރުކާރުގެ ހޮސްޕިޓަލްތަކުން މެޑިކަލް ޗެކްއަޕް ހެދޭނެ ކަމަށެވެ.

އާސަންދައިގެ ދަށުން މެޑިކަލް ޗެކަޕް ހަދަން އެންމެ ފުރަތަމަ ފުރުސަތު ހުޅުވާލީ 50 އަހަރުން މަތީގެ މީހުންނަށެވެ. އެއީ 1 ޖެނުއަރީ 2024 އިން ފެށިގެނެވެ. އޭގެފަހުން 1 އޭޕްރީލް 2024 އިން ފެށިގެން 18 އަހަރުން ދަށުގެ ކުދިންނަށާއި އުމުރުން 40 އަހަރުން މަތީގެ މީހުންނަށް ފުރުސަތު ހުޅުވާލިއެވެ.

މި ފުރުސަތުގެ ދަށުން ރަށްރަށުގައި ނަމަ މެޑިކަލް ޗެކަޕް ހެއްދެނީ ސިއްހީ މަރުކަޒުތަކާއި ރީޖަނަލް އަދި އަތޮޅު ހޮސްޕިޓަލްތަކުންނެވެ. މާލޭގައި ނަމަ ހުޅުމާލޭ ހޮސްޕިޓަލާއި އައިޖީއެމްއެޗް އަދި ވިލިމާލެ ހޮސްޕިޓަލުންނެވެ.  

މެޑިކަލް ޗެކަޕް މާލޭ ސަރަހައްދުގައި ހިމެނޭ ހޮސްޕިޓަލަކުން ހައްދާނަމަ، އެ ހޮސްޕިޓަލަކަށް ގުޅާ ނަންނޯޓު ކުރަން ޖެހެއެވެ. އަދި ނަންނޯޓުކުރާ ތަރުތީބުން ހޮސްޕިޓަލްތަކުން އަންނަނީ އެޕޮއިންޓްމެންޓު ދޫކުރަމުންނެވެ.