ދައުލަތުގެ ޚަރަދު ބޮޑުވެގެން ދިއުމާއި ގުޅިގެން ޚަރަދު ކުޑަ ކުރުމުގެ ގޮތުން، ރައްޔިތުންގެ މަޖިލީހުގެ މެމްބަރުންގެ އަދަދާއި، ރަށު ކައުންސިލް މެމްބަރުންނާއި އަދި އަތޮޅު ކައުންސިލްތަކުގެ މެމްބަރުންގެ އިތުރުން އެކި ޤާނޫނުތަކުގެ ދަށުން އުފައްދާފައިވާ މުއައްސަސާތަކުގެ މެންބަރުންގެ އަދަދު މަދުކުރައްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، އާދިއްތަ ދުވަހުގެރޭ ޕީޕަލްސް ނޭޝަނަލް ކޮންގްރެސް (ޕީއެސްސީ) ހަރުގޭގައި އޮތް ޖަލްސާގައި ވާހަކަފުޅު ދައްކަވަމުންނެވެ.

ހަރުގޭގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ، ކުޑަ އާބާދީއެއް އޮންނަ ރަށްރަށަށް ގިނަ ކައުންސިލް މެމްބަރުންތަކެއް ހޮވުމަކީ ދައުލަތަށް ބުރަ ބޮޑު ކަމެއް ކަމަށާއި، މިފަދަ އާބާދީތަކަށް ރައީސާއި ނައިބް ރައީސް އެކަނި ހޮވައިގެން ފަރުޖެއްސޭނެ ކަމަށެވެ.

އަދި ރާއްޖޭގެ އާބާދީ އިތުރުވަމުންދާ މިންވަރަކަށް މަޖިލީހުގެ މެންބަރުންގެ އަދަދު އިތުރު ކުރުމަކީ އެ މަނިކުފާނު ގަބޫލުކުރާ ގޮތެއް ނޫންކަމާއި، އެންމެ ރަގަޅު ގޮތަކީ 17 ވަނަ މަޖިލީހާއި އެއްގޮތަށް، ރައްޔިތުންގެ މަޖިލީހުގެ މެމްބަރުންގެ އަދަދު 77 އަށް ދަށް ކުރުން ކަމުގައި އެމަނިކުފާނު ވިދާޅުވިއެވެ. އަދި އެއީ ދައުލަތުގެ ޚަރަދު ބޮޑު ތަނުން ކުޑަކުރެވޭނެ ކަމެއް ކަމަށް ވެސް އެ މަނިކުފާނު ފާހަގަ ކުރެއްވެވިއެވެ.

ދެން ރައީސުލްޖުމްހޫރިއްޔާ ވިދާޅުވީ، ކޮމިޝަންތައް ހިންގުމަށް ވެސް ގިނަ މެމްބަރުންތަކެއް ބޭނުން ނުވާކަމަށާއި، ބޭނުންވަނީ އިހުލާސްތެރިކަމާއެކު މަސައްކަތްކުރާނެ މަދު ބައެއް ކަމަށެވެ. އެހެންކަމުން، ކޮމިޝަންތަކުގެ މެންބަރުންގެ ޢަދަދު ވެސް ކުޑަކުރުމަށް ޤާނޫނުތަކަށް އިސްލާހު ހުށަހަޅުއްވާނެ ކަމަށް އެމަނިކުފާނު ވިދާޅުވިއެވެ.

މީގެ އިތުރުން، އެއްބާވަތެއްގެ މަސައްކަތްކުރާ ކޮމިޝަންތައް އެއްކޮށްލުމުގެ ވިސްނުންފުޅު ގެންގުޅުއްވާ ކަމަށާއި، އޭރުން އެ ކޮމިޝަންތަކުން ރައްޔިތުންނަށް ކުރާ ފައިދާ ބޮޑުވެ، ކޮމިޝަންތަކުގެ ނަތީޖާ ނެރެވޭ މިންވަރު އިތުރުވެގެން ދާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ.