ނަފްސާނީ އެހީތެރިކަމަށް ބޭނުންވާކަމަށް ބެލެވޭ ކުއްޖަކު، ރައީސް އިބްރާޙިމް މުޙައްމަދު ޞާލިހުގެ އަނބިކަނބަލުން، ފަޒުނާ އަހުމަދުގެ ސަމާލުކަމަށް އައިސް، އެ ކުއްޖާއަށް އެހީތެރިވެދިނުމަށް ގޮވާލައްވައިފިއެވެ. ފަޒުނާ މިހެން ގޮވާލައްވާފައިވަނީ ސޯސަލް މީޑިއާގެ ޕްލެޓްފޯމެއް ކަމަށްވާ ފޭސްބުކްގައެވެ.

މިކަމަށް ގޮވާލައްވައި ފަޒުނާ ރޭ ހިއްސާކޮށްފައިވާ ސްކްރީންޝޮޓުތަކުން ފެންނަނީ، އެ ކުއްޖާގެ ފޭސްބުކް ފްޕޮފައިލްއަށް ލާފައިވާ ފޮޓޯ އަކާއި، އަދި އެކުއްޖާ ފޭސްބުކްގައި ކޮށްފައިވާ ފޮޓޯ ޕޯސްޓެކެވެ. އަދި އެ ކުއްޖާ ފޭސް ބުކްގައި ބޭނުންކޮށްފައިވާ ނަމަކީ "ކެލާ ހުސުފަޔާދުވާ ސާއިދު" މިހެނެވެ.

އެ ކުއްޖާގެ ފޭސްބުކް ޕްރޮފައިލުން ފެންނަނީ ކަޅާ ހުދުން ކުރަހާފައިވާ މަންޒަރެކެވެ. އެ މަންޒަރުން ފެންނަ ކުއްޖާގެ ބޮލުގެ ބަދަލުގައި ވަނީ އަނދިރި ގަނޑެކެވެ. މިފަދަ ކުރެހުން ބޭނުންކުރަނީ ނަފްސާނީ ގޮތުން ދިމާވެފައިވާ އުނދަގޫ ހާލަތެއް ބުނެދިނުމަށެވެ. ނޫންނަމަ، ޑިޕްރެޝަން ނުވަތަ އެންޒައިޓީ ތަހައްމަލު ކުރަމުންދާ މީހެއްކަން ބުނެދިނުމަށެވެ.

ފަޒްނާ ހިއްސާކޮށްފައިވާ އެ ކުއްޖާގެ ޕްރޮފައިލް

އެކުއްޖާގެ ފޮޓޯ ޕޯސްޓުގައި ވަނީ، ގޮތް ހުސްވެ ބޮޑު ފިކުރެއްގެ ތެރޭގައި އިންނަ މީހަކު ރަމްޒުކޮށްދޭ ކުރެހުމެކެވެ. އަދި އެ ފޮޓޯއާއެކު އިނގިރޭސި ބަހުން ލިޔެފައިވަނީ، ތަދާއި ވޭނަކީ އެއިން ސަލާމަތްވެވޭނެ ކަމެއް ނޫން ކަމާއި ނަމަވެސް އެކަން ތަހައްމަލުކުރުމަކީ ތިމާގެ އިހުތިޔާރުގައި އޮތް ކެމެކޭ ކަމެވެ.

ފަޒްނާ ހިއްސާކޮށްފައިވާ އެ ކުއްޖާގެ ފޭސްބުކް ޕޯސްޓް

މި ސްކްރީން ޝޮޓްތައް ހިއްސާކޮށް، ފަޒުނާ ޓެގް ކޮށްފައިވަނީ މިނިސްޓްރީ އޮފް ހެލްތާއި، މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓާއި، ސެންޓަ ފޯ މެންޓަލް ހެލްތް، އިންދިރާ ގާންދީ މެމޯރިއަލް ހޮސްޕިޓަލް، މޯލްޑިވްސް ޕޮލިސް ސާވިސް، ކުޅުދުއްފުށި ޕޮލިސް ސްޓޭޝަން އަދި ކެލާ ކައުންސިލެވެ.