ކޮންމެ ދިރޭ އެއްޗެއްގެވެސް އެންމެ މުހިއްމު ގުނަވަނަކީ ބޮލެވެ. ބޮލާއި ހަށިގަނޑު ވަކިވެއްޖެނަމަ އިންސާނެއްވެސް އަދި ޖަނަވާރެއްވެސް ދިރިހުރުމަކީ މުސްތަޙީލް ކަމެކެވެ. އެހެން ނަމަވެސް ނާދިރު ހާލަތެއް ދިމާވި ކުކުޅެއްގެ ވާހަކަ އެމެރިކާގެ މީހުންގެ މެދުގައި ވަރަށް ކުރިން ފެށިގެން އޮތެވެ.

މައިކްގެ ނަމުން ނަންދީފައިވާ، އެމެރިކާގެ ކުކުޅެއް ވަނީ ބޮލާއި ނުލައި 18 މަސްދުވަހު ދިރިއުޅެފައެވެ. އެކުކުޅުގެ ތުންގަނޑާއި ލޮލާއި ބޮލުން ބައެއް ވަކިވީ، އެކްސިޑެންޓަކުންނެވެ. މިހާދިސާ ހިނގީ 1945 ވަނަ އަހަރުގައެވެ.

އެމެރިކާގެ ދަނޑުވެރިއެއް ކަމުގައިވާ، ލިޔޮންޑް އޯލްސެން އޭނާގެ ފާމުގައި ގެންގުޅުނު މި ކުކުޅުގެ ބޮލުގައި ކޯރާޑިއަކުން ޖެހި ތުންގަނޑާއި ލޮލާއި ބޮލުގެ ސިކުނޑި ފިޔަވައި، ބޮލުގެ ބޮޑުބައެއް ވަކިވިއެވެ. އެދުވަހުން ފެށިގެން، އެކުކުޅުގެ ކާއެއްޗެހި ދަތުރުކުރާ ހޮޅީގެ ތެރެއަށް ލޮލަށް ބޭސްއަޅާކަހަލަ ކުޑަފުޅިއަކުން ކާނާ އަޅައި ކާންދޭން ފެށިއެވެ. މިގޮތުން ފެނާއި ކުދި ގޮވާންފުއްތައް އެކުކުޅަށް ކާންދެމުން ގެންދިޔައެވެ.

ބޯ ނެތް މިކުކުޅު ދިރިހުރުން ވެގެން ދިޔައީ ވަރަށް ބޮޑު އަޖާއިބަކަށެވެ. އެހެން ނަމަވެސް ދޮޅު އަހަރު ފަހުން 1947 ވަނަ އަހަރު އެކުކުޅު މަރުވިކަމަށް ރެކޯޑްކޮށްފައި ވަނީ އޭގެ ކާއެއްޗެހި ދަތުރުކުރާ ހޮޅީގެ ތެރޭގައި، ޒުވާރި އޮށެއް ތާށިވެ ހާސްވެގެންނެވެ.

އާދަޔާއި ޚިލާފު ނާދިރު ގޮތެއްގައި ދިރި ހުރި މިކުކުޅަށް، މިރަކަލް މައިކްގެ ނަމުން ނަންދީފައިވެއެވެ.