ޖަރުމަނު ދުށް އެންމެ މޮޅު އެއް މިޑްފީލްޑަރު، އަދި ސްޕެނިޝް ލީގުގައި ކުޅެމުން ދިޔަ މޮޅެތި މިޑްފީލްޑަރުންގެ ލިސްޓުގެ ކުރީ ސަފުގައި ހިމެނޭ ޓޯނީ ކްރޫޒް މިރޭ ޔޫރަޕިއަން ޗެމްޕިއަންޝިޕްގައި ކުޅޭ ކުއާޓާ ފައިނަލު މެޗަކީ، އޭނާގެ ކުޅުން ބަލާލުމަށް އަހަރެމެންނަށް ލިބޭ އެންމެ ފަހު ފުރުސަތުކަމަށް ވެސް ވެދާނެއެވެ.

ރިއާލް މެޑްރިޑާއެކު ހަދާފައިވާ ކޮންޓްރެކްޓް ދެން އައު ނުކުރަން ނިންމައި، ޕްރޮފެޝަނަލް ފުޓުބޯޅަ ކެރިއަރުގެ އެންމެ ފަހު ޖުމްލަތައް ލިޔަމުންދާ ކްރޫޒް ބުނެފައިވަނީ، ޔޫރޯ ފުޓުބޯޅަ މުބާރާތާއެކީ އޭނާގެ ބޫޓު އެލުވާލާނެކަމަށެވެ.

ހަމަގައިމު ވެސް ދެން އޭނާ ރެއާލް މެޑްރިޑުގެ ޖާޒީގައި ޕްރޮފެޝަނަލް މެޗެއް ނުކުޅޭނެއެވެ. އަދި މިރޭ ސްޕެއިންއާ ބައްދަލުކުރާ މެޗަކީ ގައުމީ ޓީމަށް އޭނާ ކުޅެދޭ އެންމެ ފަހު މެޗަށް ވުން ވެސް ގާތެވެ. އެހެންކަމުން މިރޭގެ މެޗުގައި އޭނާ ކުޅޭ 90 މިނެޓުގައި އަޅާ ކޮންމެ ފިޔަވަޅަކީ، ޖަރުމަނު ސަޕޯޓަރުންނާއި، ކްރޫޒްއަށް ސަޕޯޓުކުރާ މީހުނަށް މުހިންމު ފިޔަވަޅެކެވެ.

ކްރޫޒް އާ އެކު ނިމިދިޔަ ސީޒަނުގައި މެޑްރިޑަށް ކުޅެފައިވާ ހޮސޭލޫ ދިން އިންޓަވިއުއެއްގައި އޭނާ ބުނެފައިވަނީ، މިރޭގެ މެޗަކީ ކްރޫޒްގެ ފަހު މެޗަށް ވާން ސްޕެއިން ޓީމުން ބޭނުންވާކަމަށެވެ. އަދި ކްރޫޒްއަކީ ރަހްމަތްތެރިއެއް ކަމަށް ވިޔަސް، މުބާރާތަށް ވިސްނާނަމަ، އެ ނޫން ވިސްނުމެއް ނެތްކަމަށް އޭނާ ބުނެފައިވެއެވެ.

ޔޫރޯ ފުޓުބޯޅަ މުބާރާތަށްފަހު ޕްރޮފެޝަނަލް ފުޓުބޯޅައިން ރިޓަޔާ ކުރުމަށް އުމުރުން 34 އަހަރުގެ ކްރޫޒް ނިންމާފައިވަނީ މިދިޔަ މެއި މަހުއެވެ. މި ނިންމުން ވެގެން ދިޔައީ، ރެއާލް މެޑްރިޑާއި އަދި ގިނަ ބަޔަކަށް ސިހުން ގެނުވި ނިންމުމަކަށެވެ. ސަބަބަކީ މިހާރު އޭނާގެ ފޯމާއި ކުޅެމުންދާ މޮޅު ކުޅުމެވެ. ނަމަވެސް ރިޓަޔާ ކުރާނީ ކެރިއަރުގެ އެންމެ އުހުގައި ހުރެފައި ކަމަށް ކުރޫޒް ވަނީ ކުރިން ބުނެފައެވެ.

ކުއާޓާ ފައިނަލާ ގުޅޭ ގޮތުން ކްރޫޒް ބުނެފައިވަނީ، ޖަރުމަނު ޓީމުން މިރޭ މަސައްކަތް ކުރާނީ މެޗު ޑޮމިނޭޓް ކުރަން ކަމަށެވެ. ނަމަވެސް މިރޭ ސްޕެއިން ޓީމުން އޭނާއާ ދެކޮޅަށް ނިކުންނާނީ ވެސް އެފަދަ ދެވަނައެއް ނެތް ފެންވަރުގެ މިޑްފީލްޑަރ ރޮޑްރީއެވެ.

ރޮޑްރީގެ ލީޑަޝިޕް ސްޕެއިން އެންމެ ފަހުން ކުޅުނު މެޗުގައި ވެސް ފެނިގެން ދިޔައެވެ. ސްޕެއިން ގަދަ-16 ގައި ކުޅުނު މެޗުގައި ބައިކޮޅަށް ގޯލެއް ވަނުމާއެކީ، ކުޅުންތެރިން ހަމަޖައްސާ، ދަނޑު ތެރޭގައި ކުޅުންތެރިންނަށް ހިތްވަރު ދިން މަންޒަރު ކެމެރާތަކުން ފެނުނެވެ. އެހެންކަމުން މެޗުގެ ކޮންޓްރޯލް އަލުން ހޯދުމުގައި ބޮޑު ދައުރެއް އޭނާ ވަނީ އަދާކޮށްފައެވެ. މީގެ އިތުރުން، އެ މެޗުގައި ސްޕްއިންގެ ފުރަތަމަ ގޯލު ވެސް ކާމިޔާބުކުރީ އޭނާއެވެ.

ޔޫރޯގައި މިހާތަނަށް އެންމެ މޮޅު ކަމަށް ގަބޫލުކުރެވޭ ދެ ޓީމުގެ ކުރިމަތިލުން މިރޭ އޮންނައިރު، މެޗު ޑޮމިނޭޓް ކުރުމުގައި ކުރޫޒް އާއި ރޮޑްރީގެ ކުރިމަތިލުން ވެސް ބަލާ ފޫހިނުވާނެއެވެ.