ސްޕާއެއްގެ ނަމުގައި ހަށިވިއްކަމުން ދިޔަ ތަނެއް ރެއިޑްކޮށް، 55 އަހަރުގެ ދިވެހި ފިރިހެނަކާއި 3 އަންހެނުން ފުލުހުންގެ ބެލުމުގެ ދަށަށް ރޭ ގެންގޮސްފިއެވެ.

ފުލުހުންގެ މި އޮޕަރޭޝަން ހިންގާފައިވަނީ އެ ސްޕާގައި ހަށިވިއްކާ ކަމުގެ މައުލޫމާތު ލިބިގެންކަމަށް އެ އިދާރާއިން ވަނީ ހާމަކޮށްފައެވެ. އަދި އެތަން ކޯޓު އަމުރެއްގެ ދަށުން ބަލާ ފާސްކޮށް، ފުލުހުންގެ ބެލުމުގެ ދަށަށް ގެންގޮސްފައިވަނީ 55 އަހަރުގެ ފިރިހެނަކާއި ތައިލެންޑުގެ 3 އަންހެނުން ކަމަށް ވެސް މައުލޫމާތު ލިބެއެވެ.

ހައްޔަރުކުރި ތައިލެންޑަށް ނިސްބަތްވާ ކުދިންގެ ތެރޭގައި 30 އަހަރުގެ 2 އަންހެނުންގެ އިތުރުން ދެން ހިމެނެނީ 28 އަހަރުގެ އަންހެނެކެވެ.

މީގެ އިތުރުން، ފުލުހުންގެ އިންޓެލިޖެންސްއަށް ލިބުނު މައުލޫމާތަކާ ގުޅިގެން ޖުލައި 3 ވަނަ ދުވަހުގެރޭ ހިންގި އޮޕަރޭޝަނެއްގައި ވިއެޓްނާމަށް ނިސްބަތްވާ 2 އަންހެނަކު އިމިގްރޭޝަންގެ ބެލުމުގެ ދަށަށް ގެންގޮސްފައިވާކަމަށް އެ އިދާރާއިން ވަނީ ހާމަކޮށްފައެވެ. އަދި މި ދެ އަންހެނުންގެ އަތުން ފެނުނު ގިނަ އަދަދެއްގެ ފައިސާގެ ފޮޓޯ ވެސް އިމިގްރޭޝަނުން އާންމުކޮށްފައިވެއެވެ.