ފުޓްބޯޅަ ތަރި, އަރޖެންޓީނާގެ ލިއޮނެލް މެސީ, އެމެރިކާގެ އިންޓަރ މިއާމީއަށް ބަދަލުވެ ކުޅުނު ފުރަތަމަ މެޗުން ވެސް އެޓީމަށް މުހިންމު މޮޅެއް ހޯދައިދީފިއެވެ. ލީގްސް ކަޕް މެޗުގައި ހުކުރު ދުވަހުގެ ރޭ އިންޓަމިއާމީ ބައްދަލުކުރީ މެކްސިކޯގެ ކްރޫޒް އަޒުލް އާއި އެވެ. ކޮންމެ ޓީމަކަށް ވެސް ލަނޑެއް ކާމިޔާބު ކުރެވި, 1-1 ގެ ނަތީޖާއަކުން މެޗު ނިމެން ކުޑަތަން ވެފައިވަނިކޮށް, ޕެނަލްޓީ އޭރިއާ ކައިރިން, ކްރޫޒް އަޒުލްގެ ސީދާ ގޯލް ކުރިމަތިން ލިބުނު ހިލޭ ޖެހުން މެސީ ފޮނިވާލީ ގޯލުގެ ވާތު ކަނަށެވެ. 

މިއާމީއަށް ބަދަލުވިފަހުން މެސީ އަދި ތަމްރީނުތަކުގައި ބައިވެފައިވަނީ ތިން ދުވަހުއެވެ. އެހެންކަމުން މި މެޗުގައި މެސީ ކުޅެން ނިކުތީ ބެންޗުންނެވެ. އަދި މެޗުގައި ކުޅުމުގެ ތެރެއިން ގޯލު ޖަހާނެ ރަގަޅު ފުރުސަތުތަކެއް ފަހިވެގެން ގޮސްފައި ނުވި ނަމަވެސް, މިއާމީ މޮޅުވި ގޯލު ކާމިޔާބުކުރި ހިލޭ ޖެހުމަކީ މެސީއަށް ކުރި ފައުލަކާ ގުޅިގެން ލިބުނު ހިލޭ ޖެހުމެކެވެ.

ލީގްސް ކަޕް އަކީ މިހާރު އެމެރިކާ އާއި މެކްސިކޯގެ ޓީމު ތަކުގެ މެދުގައި ކުޅޭ ސަރަހައްދީ މުބާރާތެކެވެ. އެގޮތުން ދެ ގައުމުގެ ފުރަތަމަ ލީގުގައި ކުޅޭ ޖުމްލަ 47 ޓީމު މި މުބާރާތުގައި ވާދަކުރެއެވެ.