މަސްވެރިން ބާނާ މަސް މިފްކޯއަށް ގަންނަ އަގު ކުޑަކޮށް ހޯމަ ދުވަހުން ފެށިގެން ގެނެސްފައިވާ ބަދަލުތަކާއި އެކުގައިވެސް، ރިޔާސީ އިންތިޚާބުގެ ތެރޭގައި މަސްވެރިންނަށް ވީ ވަޢުދާއި އެއްގޮތަށް، 48 ގަޑިއރުގެ ތެރޭގައި މަސްވެރިން ކިރުވާ މަހަށް ފައިސާ ނުދެވޭނެ ކަމުގައި ފިޝަރީޒް މިނިސްޓަރ އަޙްމަދު ޝިޔާމް ވިދާޅުވެއްޖެއެވެ.

މިނިސްޓަރ ޝިޔާމް މިހެން ވިދާޅުވީ، ރާއްޖޭގެ ބައެއް މީޑިއާތަކާއި އިއްޔެ ބައްދަލުކުރައްވައި މަސްވެރިކަމުގެ ސިނާޢަތު ރަނގަޅު ކުރުމަށް ކުރައްވަމުން ގެންދަވާ މަސައްކަތްތަކާއި، މަސްވެރިންނަށް މިފްކޯއިން ދޭން ޖެހޭ ފައިސާ ދިނުމަށް ކުރައްވަމުން ގެންދަވާ މަސައްކަތް ތަކާއި ގުޅޭ ގޮތުން ވާހަކަފުޅު ދައްކަވަމުންނެވެ.

މިނިސްޓަރ ޝިޔާމް ވިދާޅުވީ، މަސްވެރިން ކިރުވާ މަހަށް 48 ގަޑިއިރުގެ ތެރޭގައި ފައިސާދެވޭނެ އިންތިޒާމްތައް ހަމަޖެއްސުމަކީ، ސަރުކާރުން ޙާސިލްކުރަން ބޭނުންވާ އަމާޒެއް ކަމަށެވެ. އެހެން ނަމަވެސް ކުރިޔަށް އޮތް 2 އަހަރުގެ ތެރޭގައިވެސް އެ ވަޢުދު ނުފުއްދޭނެ ކަމުގައި ފިޝަރީޒް މިނިސްޓަރ އިއްޔެ ވަނީ ފާހަގަކުރައްވާފައެވެ.

Advertisement

ފިޝަރީޒް މިނިސްޓަރ ޝިޔާމް ވިދާޅުވީ، 48 ގަޑިއިރުގެ ތެރޭގައި ފައިސާ ދިނުމަށް ސަރުކާރުން ވަޢުދުވެފައިވާތީ އެވާކަތައް ދެކެވުނު ނަމަވެސް މަސްވެރިންނަށްވެސް އެންމެ ޕްރެކްޓިކަލް ގޮތެއްގައި ފައިސާދިނުމަށް ސަރުކާރަށްވެސް ފެނިވަޑައިގަންނަވަނީ ކޮންމެ ހަފްތާއަކުން ހަފްތާއަކުން ފައިސާ ދިނުން ކަމުގައި މިނިސްޓަރ ޝިޔާމް ވިދާޅުވިއެވެ. އަދި މަސްވެރިންވެސް އެދެނީ ހަފްތާއިން ހަފްތާއަށް ފައިސާ ލިބުން ކަމަށާއި، 48 ގަޑިއިރުގެ ތެރޭގައި މަސްވެރިންނަށް ފައިސާ ދޫކުރެވޭ ހިސާބަށް ދެވޭނީ، މިފްކޯއަކީ ފައިދާވާ ކުންފުންޏަކަށް ހެދިގެން ކަމަށެވެ. އަދި އަމާޒަކީ މިފްކޯއަކީ ސަރުކާރުންދޭ ސަބްސިޑީއާ ފައިސާއަށް ބަރޯސާ ނުވެ ހިންގާ ކުންފުންޏަކަށް ހެދުމަކީ އަމާޒު ކަމަށާއި، މިހާރު ގެންނަމުންދާ ބަދަލުތަކާއި އެކީގައި، 2026 ވަނަ އަހަރުގެ އޮގަސްޓް މަހުގެ ނިޔަލަށް އެ ހިސާބަށް ވާޞިލްވެވޭނެ ކަމަށް އަމާޒު ހިފާފައިވާ ކަމަށެވެ.