މިސަރުކާރުން މަސްވެރިންގެ އަތުން، މަސްކިލޯއެއް 20ރ އަށް ގަންނާނެ ކަމަށް ވަޢުދުވި އެއް ސަބަބަކީ، ކުރީ ސަރުކާރުން ދެމުން އައި އުއްމީދު ތަކަކީ ހަޤީޤަތެއް ކަމަށް ބަލައިގެން ކަމުގައި ފިޝަރީޒް މިނިސްޓަރ އަޙްމަދު ޝިޔާމް މުހައްމަދު ވިދާޅުވެއްޖެއެވެ.

ރާއްޖޭގެ މީޑިއާތަކުގެ ނޫސްވެރިންނާއި އެކު ފިޝަރީޒް މިނިސްޓަރ އެމަނިކުފާނުގެ އަމިއްލަފުޅު ޚަރަދުގައި މިއަދު ބޭއްވި ހެނދުނުގެ ނާސްތާއެއްގެ ކުރިން ވަނީ ނޫސްވެރިން ކުރި ސުވާލުތަކަށް ޖަވާބުދެއްވާފައެވެ. އަބަދުވެސް ނޫސްވެރިންނާއި މަސްވެރިންނާއި އެކު ގާތްގުޅުމެއް ބާއްވަވަމުން ގެންދަވާ ފިޝަރީޒް މިނިސްޓަރ ވަނީ، މިބައްދަލުވުމުގައި، ރާއްޖޭގެ މަސްވެރިކަމުގެ ސިނާޢަަތަށް މިވަގުތު ކުރިމަތިވެފައިވާ ގޮންޖެހުންތަކާއި، މިފްކޯ ބަނގުރޫޓުވެގެން ދިޔަ ނުދީ ހިފެހެއްޓެވުމަށާއި، މަސްވެރިންނަށް ހުރި ދަތިތައް ހައްލުކުރެއްވުމަށް ސަރުކާރުން އަޅުއްވަމުން ގެންދަވާ ފިޔަވަޅުތަކުގެ މަޢުލޫމާތު ވަރަށް ތަފްޞީލް ގޮތެއްގައި ނޫސްވެރިންނާއި ހިއްސާ ކުރައްވާފައެވެ.

ނޫސްވެރިންނާއި އެކު ފިޝަރީޒް މިނިސްޓަރ މިއަދު ބޭއްވެވި ބައްދަލުކުރެއްވުމުގެ ތެރެއިން ---

މިފްކޯއަށް މަސްގަންނަ އަގަށް މިއަދުން ފެށިގެން އެކުންފުނިން ބަދަލުތަކެއް ގެނެސްފައި ވާއިރު، ސަރުކާރުން ވަޢުދުވީ އަގު ކަމުގައިވާ 20ރ އަށް މަސްކިލޯއެއް ގަނެވެން ނެތް ސަބަބުވެސް އެމަނިކުފާނު ވަނީ ހާމަކުރައްވާފައެވެ. ފިޝަރީޒް މިނިސްޓަރ ވިދާޅުވީ، ރިޔާސީ އިންތިޚާބުގެ ތެރޭގައި މިސަރުކާރުން މަސްވެރިންގެ އަތުން 20ރއަށް މަސްކިލޯއެއް ގަތުމަށް ވީ ވަޢުދު ބިނާކުރި އެއް ސަބަބަކީ، ޔޫރަޕަށް ރާއްޖޭގެ މަސް އެކްސްޕޯޓްކުރުމަށް ނަގަމުން އައި ޑިއުޓީ، ވަރަށް އަވަހަށް އުވާލާނެ ކަމަށް ވިދާޅުވެ ކުރީގެ ސަރުކާރުން މަސްވެރިންނަށާއި ރައްޔިތުންނަށް ދެމުން އައި އުއްމީދު ކަމަށެވެ. އަދި އެކަން އެގޮތަށް ހަމަޖެހިގެންދާނެ ކަމުގައި އެބޭފުޅުންވެސް އުއްމީދު ކުރެއްވި ކަމުގައި ފިޝަރީޒް މިނިސްޓަރ ވިދާޅުވިއެވެ. އަދި އޭރު ކުރީގެ ސަރުކާރުން މަސްކިލޯއެއް 25ރ އަށް ގަންނަން ފެށިކަންވެސް މިނިސްޓަރ ފާހަގަ ކުރެއްވިއެވެ.

ފިޝަރީޒް މިނިސްޓަރ އަޙްމަދު ޝިޔާމް ވިދާޅުވީ، އެ މުއާމަލާތްތައް ހިނގައި ގޮސްފައިވާ ހިސާބު އެނގުނީ އެބޭފުޅުން، ސަރުކާރު ހިންގުމާއި ހަވާލުވެވަޑައިގެންނެވުމަށް ފަހުގައި ކަމަށެވެ. އަދި މިސަރުކާރު ވެރިކަމަށް އައިރު އެ މުއާމަލާތްތައް އޮތް ހިސާބު ބަލާލުމުން އެއީ، އީޔޫއިން ރާއްޖެއިން އެކްސްޕޯޓް ކުރާ މަހަށް ޑިއުޓީ ކަނޑާލާނެ ކަމުގެ ގްރީން ސިގްނަލެއް ލިބުނު ކަމަށް ވިދާޅުވާ ހެޔޮނުވާނެ ކަމުގައިވެސް ފިޝަރީޒް މިނިސްޓަރ ވިދާޅުވިއެވެ.

ރާއްޖެއިން ސަމޯއާ އެގްރީމެންޓްގައި ބައިވެރިވުމަށް ރައްޔިތުންގެ މަޖިލީހުން އިއްޔެ ފާސްކޮށްފައިވާއިރު، އީޔޫއިން ރާއްޖެއިން އެކްސްޕޯޓް ކުރާ މަހަށް ޑިއުޓީ ކަނޑާލާނެ ކަމުގެ ގްރީން ސިގްނަލެއް ލިބިފައިވާ ކަމަށް ކުރީ ސަރުކާރުގެ ވެރިން ވިދާޅުވީ އެ އެގްރިމެންޓްގައި ރާއްޖެއިން ބައިވެރިވުމަށް ވެދާނެކަމުގައި ވެސް ފިޝަރީޒް މިނިސްޓްރީން ވިދާޅުވެއެވެ.

މިސަރުކާރު ވެރިކަމަށް އައީ، މަސްވެރިންގެ އަތުން މަސްކިލޯއެއް ގަންނާނެ އެންމެ ދަށް އަގަކީ، 20ރ ކަމުގެ ވަޢުދާއި އެކުގައި ނަމަވެސް، މިފްކޯގެ މާލީ ހާލަތު ދަށްކަމާއި، ސަރުކާރަށް އުފުލަންޖެހިފައި އޮތް މާލީ ބުރަތަކުގެ ސަބަބުން، މިހަފްތާއިން ފެށިގެން މަސްކިލޯއެއް މިފްކޯއަށް ގަންނަ އެންމެ މަތީ އަގަކީ 16ރ ކަމުގައި އެކުންފުނިން ވަނީ ކަނޑައަޅާފައެވެ. އަދި އެކުންފުނިން ވަނީ، ހަފްތާއަކުން ހަފްތާއަކުން، ދުނިޔޭގެ ބާޒާރަށް އަންނަ ބަދަލުތަކަށް ބަލައި މަސް ގަންނަ އަގަށް ބަދަލު ގެންނާނެކަންވެސް ހާމަކޮށްފައެވެ.