ޔޫރޯގެ އެންމެ ފަހުގެ ޗެމްޕިއަން އިޓަލީ 2-0 އިން ބަލިކުރުމަށްފަހު، ސްވިޒަލޭންޑުން ޖެހިޖެހިގެން ދެވަނަ ފަހަރަށް ކުއާޓާ ފައިނަލުން ޖާގަ ހޯދައިފިއެވެ. ޖަރުމަނު ހިމެނޭ ގްރޫޕް-އޭ އިން ދެވަނަ ޓީމުގެ ގޮތުގައި ގަދަ-16 އަށް ދަތުރުކުރި ސްވިޒަލޭންޑު ވަނީ މެޗަކުން ބަލިނުވެ ގްރޫޕް ސްޓޭޖުގައި 5 ޕޮއިންޓު ހޯދާފައެވެ.

އުފެއްދުންތެރި ކުޅުމެއް ނުދެއްކި، މިއީ އިޓަލީއަށް ބޮޑު މުބާރާތެއްގައި އެންމެ އާދައިގެ ކުޅުމެއް ދެއްކުނު ފަހަރުކަމަށް ގިނަ ބަޔަކު ގަބޫލުކުރާއިރު، ސްވިޒަލޭންޑުން ޖަހާފައިވާ ގޯލުތަކުގައި ވެސް ލޫސިއާނޯ ސްޕަލެޓީގެ އިޓަލީ ޓީމުގެ ފަރުވާ ކުޑަކަން ފާހަގަކުރެވުނެވެ.

މި މެޗުގައި ސްވިޒަލޭންޑުން ޖަހާފައިވާ ދެ ގޯލުގައި ވެސް ޖަރުމަނު ލީގުގެ އޮގްސްބާގްގައި ކުޅެމުން އަންނަ ރޫބެން ވާރގާސްގެ ތަފާތު ފެނިގެން ދިޔައެވެ. އެގޮތުން މެޗުގެ 37 ވަނަ މިނެޓުގައި ރީމޯ ފްރެއުލާ ޖެހި ގޯލަކީ ވާރގާސް ތަނަވަސްކޮށްދިން ފުރުސަތެކެވެ. އަދި ދެވަނަ ހާފުގެ ފުރަތަމަ މިނެޓުގައި އޭނާވަނީ އިޓަލީގެ ޕެނަލްޓީ އޭރިޔާގެ ރޮނގާ ހިސާބުން އެތެރެ ފައިން ޖަހާ ގޯލުގެ ދުރުކަނަށް ބޯޅަ ފޮނުވާލާފައެވެ.

ކުއާޓާ ފައިނަލުގައި ސްވިޒަލޭންޑު ބައްދަލުކުރަން ޖެހޭނީ އިންގްލޭންޑް އާއި ސްލޮވެކިއާ ބައްދަލުކޮށްގެން މޮޅުވާ ޓީމަކާއެވެ.

ޔޫރޯ 2020 ގައި ވެސް ސްވިޒަލޭންޑު ކުއާޓާއަށް ދަތުރުކުރީ މުބާރާތުގެ ފޭވަރިޓެއް ކަމުގައިވާ ފްރާންސް ކަޓުވާލުމަށްފަހުއެވެ. އެ މެޗުގެ ފުރިހަމަ ވަގުތު ހަމަވިއިރު 3-3 އިން އެއްވަރުވެފައިވުމުން، އެ ޓީމުން ފްރާންސްގެ މައްޗަށް ކުރި ހޮދޫ ޕެނަލްޓީ ޖަހައިގެންނެވެ. ފްރާންސަކީ ޔޫރޯ 2016 ގެ ރަނާ-އަޕް ޓީމެވެ.

މިރޭގެ މެޗުގައި އެންމެ މޮޅު ކުޅުމެއް ދައްކާފައިވަނީ އާސެނަލްގެ ކުރީގެ ކުޅުންތެރިޔާ އަދި ނިމިދިޔަ ސީޒަނުގައި ބެޔާން ލެވަކޫސެންގެ މައި ތަނބު، ގްރޭނިޓް ޒަކާއެވެ. އޭނާވަނީ ސްވިޒަލޭންޑު ޓީމުގެ އެޓޭކިންގައާއި އަދި ޑިފެންޑިންގައި ވެސް ޓީމު ލީޑު ކޮށް، ވަރިބަލިކަމެއް ނެތި މޮޅު ކުޅުމެއް ދައްކާފައެވެ.

މި މެޗާއެކީ މިރޭގެ މެޗު ކުޅުނު ބާރލިންގެ އޮލިމްޕިއާސްޓޭޑިއޯން ސްޓޭޑިއަމަކީ އިޓަލީއަށް އުފަލާއި ހިތާމައިގެ ހަނދާންތައް އެކުލެވޭ ސްޓޭޑިއަމަކަށް ވެއްޖެއެވެ. މިއީ 2006 ވަނަ އަހަރު ފްރާންސް ބަލިކޮށް އިޓަލީ އިން ދުނިޔޭގެ ތަށި އުފުލާލި ސްޓޭޑިއަމެވެ. އަނެއްކޮޅުން އެ ޓީމުން ޔޫރޯ 2024 އަށް މި ސްޓޭޑިއަމްގައި އަލްވަދާއު ކިޔަން ޖެހުނުއިރު، 2006 ގެ ވޯލްޑް ކަޕްގައި އިޓަލީ ދެއްކި ކުޅުމާއި، މި މުބާރާތުގައި އެ ޓީމުގެ ކުޅުން ފެނުނު މީހަކަށް ހައިރާންކަން ގެނުވާނެއެވެ.

މިރޭ ޔަގީންވި އެއް ކަމަކީ، އިޓަލީއަށް ބޮޑެތި ބަދަލުތަކެއް ބޭނުންވާ ކަމެވެ. އަދި މި ސަބަބުތަކާއެކި، މި މެޗަކީ އެ ޓީމުގެ ކޯޗު ސްޕަލެޓީގެ ފަހު މެޗަށް ވުން ވެސް އެކަށީގެންވެއެވެ.