ޔޫރޯ ފުޓުބޯޅަ މުބާރާތުގައި މުޅިން އަލަށް ހުރިހާ ޓީމަކަށް އެއްވަރަށް ޕޮއިންޓު ލިބިގެން އެއް ގްރޫޕެއްގެ މެޗުތައް ނިމިއްޖެއެވެ.

ގްރޫޕް އީ ގައި ހިމެނޭ ރުމޭނިއާ، ބެލްޖިއަމް، ސްލޮވެކިއާ އަދި ޔުކްރެއިންއަށް ލިބިފައިވަނީ ޖުމްލަ 4 ޕޮއިންޓެވެ. މި ގްރޫޕްގެ ހުރިހާ ޓީމެއް ވެސް ވަނީ އެއް މެޗުން މޮޅުވެ، އެއް މެޗުން އެއްވަރުވެ އަދި އެއް މެޗުން ބަލިވެފައެވެ.

ޕޮއިންޓުގެ ގޮތުން ހުރިހާ ޓީމެއް އެއްވަރުވެފައި ވީނަމަވެސް، ގޯލުގެ ތަފާތުން ގްރޫޕްގެ އެއްވަނަ ހޯދާފައިވަނީ ރުމޭނިއާއެވެ. އެމީހުން ވަނީ ގްރޫޕްގެ ފުރަތަމަ މެޗުގައި ޔުކްރެއިން 3-0 އިން ބަލިކޮށްފައެވެ. އަދި ދެވަނަ މެޗުގައި ބެލްޖިއަމް އަތުން 2-0 އިން ބަލިވެފައިވާއިރު، ގްރޫޕްގެ ފަހު މެވުގައި ސްލޮވެކިއާ އާއި ބައްދަލުކޮށް 1-1 އިން ވަނީ އެއްވަރުވެފައެވެ.

Advertisement

ގްރޫޕްގެ ދެވަނަ ލިބުނީ ބެލްޖިއަމް އަށެވެ. ބެލްޖިއަމް ބަލިވެފައިވަނީ ފުރަތަމަ މެޗުގައި ސްލޮވެކިއާ އަތުން، 1-0 އިންނެވެ. ނަމަވެސް ދެވަނަ މެޗު ބެލްޖިއަމް ވަނީ ރުމޭނިއާ އާ ބައްދަލުކޮށް 2-0 އިން ކާމިޔާބު ކޮށްފައެވެ. ގްރޫޕްގެ ފަހު މެޗު އެއްވަރުވެފައިވަނީ ޔުކްރެއިން އާ ބައްދަލުކޮށް 0-0 އިންނެވެ.

މި ގްރޫޕްގެ ތިން ވަނަ ލިބުނު ސްލޮވެކިއާއަށް ވެސް ގަދަ-16 އިން ވަނީ ޖާގަ ލިބިފައެވެ. ނަމަވެސް 4 ޕޮއިންޓާއެކު މުބާރާތާއި އަލްވަދާއު ކިޔަން ޖެހެނީ ޔުކްރެއިންނެވެ. ގްރޫޕްގެ ތިންވަނައަށްދާ 4 ޓީމަކަށް ގަދަ-16 އިން ފުރުސަތު ލިބުނު ނަމަވެސް، އޭގެ ތެރެއިން ބައެއް ޓީމުތަކަށް ވުރެން ގިނައިން ޕޮއިންޓު ލިބިފައިވާ ޔުކްރެއިންއަށް އެ ފުރުސަތު ނުލިބެނީ އެ ޓީމު ގްރޫޕްގެ 4 ވަނަ އަށް ގޮސްފައިވުމުންނެވެ.

ގްރޫޕްގެ ހުރިހާ މެޗުތަކެއް ނިމުނު އިރު ގްރޫޕް-އީ ބެހިފައިވާ ގޮތް

މީގެ އިތުން 4 ޕޮއިންޓާއެކު ގްރޫޕް ފުލަށް މީގެ ކުރިން މި މުބާރާތުގައި އެއްވެސް ޓީމެއް ގޮސްފައެއް ނުވެއެވެ. އެހެންކަމުން އެންމެ ގިނަ ޕޮއިންޓާއެކު ގްރޫޕް ސްޓޭޖުން އަލްވަދާއުކިޔާ ޓީމަކަށް ވެގެން ގޮސްފައިމިވަނީ ވެސް ޔުކްރެއިންއެވެ.