ޔޫރޯ ފުޓުބޯޅަ މުބާރާތުގެ ގަދަ 16 އިން ޖާގަ ހޯދާފައިވާ އިނގްލެންޑް ޓީމުގެ ޒުވާން މިޑްފިލްޑާ، ފިލް ފޮޑެން، އިންގްލެންޑްގެ ކޭމްޕު ދޫކޮށް އިނގިރޭސިވިލާތަށް ގޮސްފިއެވެ.

އިނގިރޭސި ފުޓުބޯޅަ ފެޑެރޭޝަނުން ހާމަކޮށްފައިވާ ގޮތުގައި ފޮޑެން ޔޫކޭއަށް ދިޔައީ އާއިލީ ކަމަކާ ގުޅިގެންކަމަށެވެ.

ބީބީސީއިން ރިޕޯޓު ކޮށްފައިވާ ގޮތުގައި އޭނާ ޔޫކޭއަށް ދިޔައީ، އޭނާގެ ތިންވަނަ ދަރިފުޅު އުފަންވުމާ ގުޅިގެންނެވެ. ނަމަވެސް، އާދީއްތަ ދުވަހުގެ ކުރިން އޭނާ އަލުން އަނބުރާ ޓީމާ ގުޅޭނެކަމަށް ރިޕޯޓުތައް ބުނެއެވެ.

Advertisement

ފޮޑެން އާއި އޭނާގެ ޕާޓްނަރ ރެބޭކާ ކޫކް، އެމީހުންގެ ތިން ވަނަ ދަރިފުޅުގެ ވާހަކަ އިއުލާންކޮށްފައިވަނީ މިދިޔަ އެޕްރީލް މަހުއެވެ.

އެދެމީހުންގެ މިހާރު ތިބެނީ ފިރިހެން ކުއްޖަކާއި އަންހެން ކުއްޖެކެވެ. ފިރިހެން ދަރިފުޅު ރޮނީގެ އުމުރަކީ 5 އަހަރެވެ. އަދި އަންހެން ދަރިފުޅުގެ އުމުރަކީ ދެ އަހަރެވެ.

ފޮޑެން ވަނީ މިހާތަނަށް އިނގިރޭސި ގައުމީ ޓީމަށް 37 މެޗު ކުޅެދީފައެވެ. އަދި މި ފަހަރުގެ ޔޫރޯ މުބާރާތުގެ ގްރޫޕް ސްޓޭޖުގެ ތިން މެޗުގައި ވެސް އޭނާ ވަނީ ފުރަތަމަ އެގާރައިގެން ހިމެނިގެން ކުޅެފައެވެ.

އިންގްލެންޑް ގަދަ 16 އަށް ދަތުރުކޮށްފައިވަނީ 5 ޕޮއިންޓާއެކު ގްރޫޕް ސީގެ އެއްވަނަ ޓީމުގެ ގޮތުގައެވެ.