ސަރުކާރު ހިންގާ ޕާޓީ، ޕީއެންސީގެ ހަރުގެ، ހ. ވެޔޮވިލާގައި ރޭ ހުޅުވައިފިއެވެ.

ރޭ އެކަމަށްޓަކައި ބޭއްވި ޚާއްޞަ ރަސްމިއްޔާތުގައި އެޕާޓީގެ ހަރުގެ ހުޅުއްވައި ދެއްވީ، ރައީސުލްޖުމްހޫރިއްޔާ، ޑރ. މުހައްމަދު މުޢިއްޒެވެ. މިރަސްމިއްޔާތުގައި ސަރުކާރު ހިންގާ ޕާޓީގެ އެތައް ސަތޭކަ މެމްބަރުންނާއި އާއްމު ރައްޔިތުންގެ ތެރެއިން ގިނަ އަދަދެއްގެ ބަޔަކު ބައިވެރިވިއެވެ.

މީގެ އިތުރުން މިރަސްމިއްޔާތުގައި ސިޔާސީ ދާއިރާގައި މީގެ ކުރިން އެހެން ޕާޓީތަކާއި އެކު މަސައްކަތް ކުރެއްވި ބޭބޭފުޅުންވެސް ވަނީ ޕީއެންސީއާ ގުޅިވަޑައިގެން އެޕާޓީގެ މެމްބަރޝިޕް ފޯމް، ރައީސުލްޖުމްހޫރިއްޔާ ޑރ. މުހައްމަދު މުޢިއްޒާއި ހަވާލުކޮށްދެއްވާފައެވެ.

ރޭ ބޭއްވި ޕީއެންސީގެ ހަރުގެ ހުޅުވުމުގެ ރަސްމިއްޔާތުގައި އެ ހަރުގެ ހުޅުއްވައި ދެއްވުމަށް ފަހުގައި ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ދެއްކެވި ވާހަކަފުޅުގައި ވަނީ، ޕާޓީގެ ހަރުގޭގޭ ބޭނުން ހެޔޮ ގޮތުގައި ހިއްޕެވުމަށް، ޕާޓީގެ މެމްބަރުންގެ ކިބައިން އެދިވަޑައިގެންފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، އިދިކޮޅު ފަރާތްތަކުން ހަދާ ދޮގުތައް ހާމަކޮށްދިނުމަށްޓަކައި ތެދު ޙަޤީޤަތާއި އެކު އެ ދޮގުތައް ހާމަކޮށްދިނުމުގެ މަސައްކަތް ޕީއެންސީގެ ހަރުގޭގައި ކުރުމަކީ އެމަނިކުފާނު އެދިވަޑައިގަންނަވާ ކަމެއް ކަމަށެވެ.

ޕީއެންސީގެ ޖަގަހަ ރޭ ހުޅުވި ހ. ވެޔޮވިލާގައި އެންމެ ފުރަތަމަ ހިންގާފައި ވަނީ، އެމްޑީޕީގެ ހަރުގެ އެވެ. އޭގެ ފަހުން އެތަނުގައި ދަ ޑިމޮކްރެޓްސްގެ ހަރުގެވެސް 8 މަހެއްހައި ދުވަހު ހިންގިއެވެ.