މިއަހަރު ރާއްޖެއިން ހައްޖަށް ދިޔަ މީހުން މާދަމާއިން ފެށިގެން އަންނަ ފަށާނެ ކަމުގައި މިނިސްޓްރީ އޮފް އިސްލާމިކް އެފެއާޒުން ހާމަކުރައްވައިފިއެވެ.

އެމިނިސްޓްރީން ހާމަކުރައްވާފައިވާ ގޮތުގައި، ރާއްޖެއިން މިއަހަރު ހައްޖަށް ދިޔަ މީހުންގެ ފުރަތަމަ ގުރޫޕުގައި ހިމެނޭ މީހުން މާލެ އަންނާނީ މާދަމާ އެވެ. ހަތަރު ގުރޫޕަކަށް ބަހާލައިގެން މީހުން އަންނަ އިރު، ހައްޖަށް ދިޔަ މީހުންގެ ދެވަނަ ގުރޫޕްގައި ހިމެނޭ މީހުން މާލެއަންނާނީ، މިޖޫން މަހުގެ 28 ވަނަ ދުވަހުގައެވެ. އަދި ތިންވަނަ ގުރޫޕްގައި ހިމެނޭ މީހުން ޖުލައި 1 ވަނަ ދުވަހު މާލެ އަންނައިރު، އެންމެ ފަހު ގުރޫޕްގެ މީހުން މާލެ އަންނާނީ ޖުލައި މަހުގެ 4 ވަނަ ދުވަހުގައެވެ.

ފުލުހުންގެ އިދާރާއިން ވިދާޅުވީ، ޙައްޖުވެރިން ރާއްޖެ އައުމަށް ހަމަޖެހިފައިވާ ދުވަސްތަކުގައި ޙައްޖުވެރިން ބަލާ އެއާޕޯޓަށް ވަޑައިގަންނަވާ ގާތްތިމާގެ މީހުންނާއި އެއާޕޯޓަށް ދަތުރުކުރާ އެއްގަމު އުޅަނދު ދުއްވާ ފަރާތްތަކުން ފުލުހުންގެ އިރުޝާދުތަކާ އެއްގޮތަށް އަމަލުކުރެއްވުމަށް އެދޭ ކަަމަށެވެ.

ރާއްޖެއިން މިއަހަރު 1150 މީހުން ހައްޖަށް ގޮސްފައިވެއެވެ. އެ އެންމެންނަކީވެސް ހައްޖު ކޯޕަރޭޝަނުގެ ހަވާލުގައި މިއަހަރު ހައްޖަށްދިޔަ މީހުންނެވެ.

ރާއްޖެއިން މިއަހަރު ހައްޖަށް ދިޔަ މީހުންނަށް މިނާގެ ފޭލިގެތަކުގައި އިންތިޒާމްތައް ހަމަޖައްސާފައިވާ ގޮތާއި މެދު ފާޑުކިޔުންތައް އަމާޒުވެފައިވެެއެވެ. އަދި މިނާގެ ފޭލިގެ ތަކުގައި ދިވެހިހައްޖާޖީން ވަރަށް ބޮޑަށް ތޮއްޖެހިގެން ތިބެން ޖެހުނު މަންޒަރު ފެންނަ ވީޑިއޯތައް ސޯޝަލް މީޑިއާގައި ދައުރުކޮށްފައިވެއެވެ.

އެހެން ނަމަވެސް ހައްޖުގެ އިންތިޒާމްތަކާއި މެދު ހައްޖުވެރިން ހިތްހަމަޖެހޭކަމަށް ބުނެ ދީފައިވާ ބަސްދީގަތުންނަށް މިނިސްޓްރީ އޮފް އިސްލާމިކް އެފެއާޒުން ވަނީ އެމިނިސްޓްރީގެ ސޯޝަލް މީޑިއާ އެކައުންޓްތަކުގައި ޕޯސްޓް ކުރަން ފަށާފައެވެ.