މިއަހަރުގެ މިހާތަނަށް މާލޭ މިސްކިތްތަކުން ވައްކަން ކުރުމުގެ 21 މައްސަލައެއް ހުށައަޅާފައިވާ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން ވިދާޅުވީ، މާލޭގެ މިސްކިތްތަކުން ވައްކަން ކުރުމުގެ މައްސަލަަތައް ހުށައެޅި އެމައްސަލަތައް ފުލުހުން ބަލަމުންދާ ކަމަށާއި، މިގޮތުން ވަގަށް ނަގާފައިވާ ބައެއްތަކެތި ހޯދައި ހަވާލުވެސް ކުރެވިފައިވާ ކަމަށެވެ. މިގޮތުން، އެ މައްސަލަތަކުގައި ހިމެނޭ 6 ފަންކާ، 2 ފޯނު އަދި ފެންމޯޓަރެއް ހޯދައި ވަނީ ހަވާލު ކުރެވިފައިވާ ކަމުގައި ސިޓީ ފުލުހުންގެ އިދާރާއިން ވިދާޅުވިއެވެ.

މާލޭ ސިޓީ ކައުންސިލުން ވިދާޅުވީ، މިސްކިތްތަކުން ވައްކަން ކުރުމުގެ މައްސަލައަކީ ބޮޑުވެފައިވާ މައްސަލައެއް ކަމަށާއި އެމައްސަލަތައް ހައްލު ކުރުމަށް ސިޓީކައުންސިލުން ގިނަ މަސައްކަތްތަކެއް ކުރަމުންދާ ކަމަށެވެ.

މާލޭ ސިޓީކައުންސިލުން ވިދާޅުވީ، މާލޭގެ ޢީދު މިސްކިތުން މި މަހު އެކަނިވެސް 10 ފަންކާ ވަގަށް ގެންގޮސްފައިވާކަމަށާއި، މިސްކިތުގެ ކެމެރާ ފުޓޭޖްތައް ނަގާ ފުލުހަށް މައްސަލަ ހުށައެޅުމުގެ މަސައްކަތް ކުރަމުންދާ ކަމަށެވެ.

އަދި މިސްކިތްތަކުން ވައްކަން ކޮށް ތަކެއްޗަށް ގެއްލުންދީ ނުހެދުމަށް މާލޭ ސިޓީކައުންސިލުން ވަނީ އިލްތިމާސްކޮށްފައެވެ. މިސްކިތްތަކަށް ވަދެ ވައްކަން ކުރާކަމަށް ތުހުމަތު ކުރެވެނީ މަސްތުވާތަކެތި ބޭނުން ކުރާ ޒުވާނުންނަށެވެ. އަދި އެމީހުން މިސްކިތްތަކުން ވަގަށް ނަގާތަކެތި ގަންނަނީ ބިދޭސީން ކަމަށްވެސް އެނގިފައި އޮވެއެވެ.