ގްރޫޕް ސްޓޭޖުގެ އެއް މެޗު ބާކީ އޮއްވައި ސްޕެއިން އިން ގްރޫޕް-ބީ ގެ އެއްވަނަ ޔަގީންކޮށް، ގަދަ-16 އިން ޖާގަ ހޯދައިފިއެވެ. މި މެޗުގައި ހަމައެކަނި ފެނިގެން ދިޔަ ގޯލަކީ އިޓަލީގެ އުއްމީދީ ޑިފެންޑަރ، ރިކާޑޯ ކެލެފިއޯރީ ގައިގައި ޖެހިފައި ބައިކޮޅަށް ވަތް ގޯލެކެވެ.

ސްޕެއިން އިން މި މެޗުގެ ފުރަތަމަ އެގާރާގައި އައިމެރިކް ލަޕޯޓޭ ބޭނުން ކުރުން ފިޔަވައި އިތުރު ބަދަލެއް އިޓަލީ ޓީމުން ވެސް ނުގެނެއެވެ. އަދި ފުރަތަމަ މެޗެކޭ އެއްގޮތަށް އިޓަލީ ކޮޅަށް މެޗުގެ ކުރީކޮޅު ގޯލެއް ނުވަދެ ސަލާމަތްވީ ހަމަކިރިޔާއެވެ. ނިކޯ ވިލިއަމްސް ތަނަވަސްކޮށްދިން ފުރުސަތަކުން ޕެޑްރީ ބޮލުން ގޯލަށް ފޮނުވާލި އިރު، އިޓަލީގެ ކީޕަރު ޑޮނަރުއްމާއަށް މި ހަމަލާ ދިފާއު ކުރެވުނީ އުދުހިފައި ކަހަލަ ގޮތަކަށް ގޮސް އިނގިލި ކުރިން ޖައްސާ ބޯޅަ ބޭރަށް ބުރުވާލުމަށްފަހުއެވެ.

މީގެ އިތުރުން މެޗުގެ 10 ވަނަ މިނެޓުގައި ވިލިއަމްސް ގޯލު ކުރިމަތިން ފޮނުވާލި ބޯޅައާއި، އޭގެ ފަހުން އަލްވާރޯ މޮރާޓާ ފޮނުވާލި ހަމަލާތަކުން އިޓަލީ ސަލާމަތްކޮށްދިނީ ޑޮނަރުއްމާއެވެ.

ފުރަތަމަ ހާފުގައި ސްޕެއިންގެ ޕެނަލްޓީ އޭރިޔާއާ ހިސާބަށް ބޯޅަ ގެންދިއުން ވެފައި އޮތީ އިޓަލީއަށް އުނދަގޫ ކަމަކަށެވެ. ނަމަވެސް ސްޕެއިންގެ ހަމަލާތަކުން ރައްކާތެރިވުމަށް ދެވަނަ ހާފުގައި އިޓަލީއިން ގެނައި ބަދަލުތަކުގެ ފައިދާވަނީ އެ ޓީމަށްކޮށްފައެވެ.

ސްޕެއިންގެ ގޯލު ފެނިގެން ދިޔަ ހަމަލާގައި އެންމެ އިސް ދައުރެއް އަދާކޮށްފައިވަނީ ވިލިއަމްސްއެވެ. އޭނާ ގޯލުގެ ކުރިމައްޗަށް ހުރަސްކޮށްދިން ބޯޅަ މޮރާޓާ ގޯލަށް ފޮނުވާލުމުން އެ ހަމަލާ ދިފާއު ކުރުމަށް ޑޮނަރުއްމާ ކުރި މަސައްކަތުން ފޯރާފައިވަނީ އޭނާގެ އިނގިލި ކުރިއެވެ. އެ ބޯޅަ ގޮސް ގޯލަށް ވަނީ ކެލެފިއޯރީގެ ގައިގައި ޖެހުމަށްފަހުއެވެ.

މި ނަތީޖާއާއެކު، އިޓަލީ އާއި ސްޕެއިން އެންމެ ފަހުން ބައްދަލުކުރި 6 މެޗުގެ ތެރެއިން ޖެހިޖެހިގެން 3 މެޗު ސްޕެއިން މިވަނީ ކާމިޔާބުކޮށްފައެވެ. މީގެ އިތުރު އެއް މެޗުން ސްޕެއިން މޮޅުވެފައިވާއިރު، އަނެއް ދެމެޗު ވަނީ އެއްވަރުވެފައެވެ.